რომელ სექტორებში განხორციელდა ყველაზე მეტი პირდაპირი უცხოური ინვესტიცია ბოლო 10 წელში
კვლევითი ინსტიტუტის Gnomon Wise-ს მიმოხილვის თანახმად, უკანასკნელი 10 წლის განმავლობაში, პირდაპირ უცხოურ ინვესტიციებში ევროკავშირის ქვეყნები და გაერთიანებული სამეფო ჭარბობდა.
ამავე ინფორმაციით, რუსეთს მხოლოდ და მხოლოდ 4% ეჭირა, რაც კიდევ ერთხელ ხაზს უსვამს იმას, რომ რუსეთი ინვესტორი ქვეყანა არასდროს ყოფილა. თუნდაც მას შემდეგ, რაც ხელისუფლებამ ე.წ. არგაღიზიანების პოლიტიკა აწარმოვა და რუსეთზე დამოკიდებულება, ექსპორტ-იმპორტის კუთხით, მკვეთრად გაიზარდა. იმავეს თქმა შეიძლება ჩინეთზეც, რომლის ინვესტიციების წილი, 2014-2023 წლებში, კიდევ უფრო დაბალი, 3%-ია.
რაც შეეხება სექტორების წილს, უკანასკნელი 10 წლის განმავლობაში, ტრანსპორტი და კავშირგაბმულობა ლიდერობდა, რასაც მოჰყვებოდა საფინანსო სექტორი, ენერგეტიკა, უძრავი ქონება, დამამუშავებელი მრეწველობა და მშენებლობა. სოფლის მეურნეობა კი მთლიანი ინვესტიციების დაახლოებით 0% იყო, რაც ე.წ. სოფლის მეურნეობის სახელმწიფო პოლიტიკის განუსაზღვრელად დიდ წარუმატებლობაზე მიუთითებს.
რაც შეეხება 2024 წლის 9 თვის შედარებას 2023 წლის 9 თვესთან, ორივე წელს სოფლის მეურნეობა კვლავ ყველაზე წარუმატებელ სექტორად რჩება და მისი წილი 0%-ს შეადგენს. პირველ ადგილზეა საფინანსო სექტორი 41%-იანი წილით, რასაც ენერგეტიკის სექტორი (16%), დამამუშავებელი მრეწველობა (15%) და ტრანსპორტი და კავშირგაბმულობა მოჰყვება (14%).
2014-2023 წლების დაჯამებული მონაცემები პირდაპირი უცხოური ინვესტიციების წილის შესახებ სექტორების მიხედვით:
- ტრანსპორტი და კავშირგაბმულობა - 53%
- საფინანსო სექტორი - 21%
- დანარჩენი სექტორები - 13%
- ენერგეტიკა - 11%
- უძრავი ქონება - 10%
- დამამუშავებელი მრეწველობა - 10%
- მშენებლობა - 7%
- სასტუმროები და რესტორნები - 4%
- სამთომოპოვებითი მრეწველობა - 3%
- ჯანდაცვის სექტორი - 2%
- სოფლის მეურნეობა - 0%
