მსოფლიოში 10 ყველაზე ძვირი/იაფი ქალაქი საცხოვრებლად - რომელ ადგილზეა თბილისი და ბათუმი
Numbeo აქვეყნებს იმ ქალაქების სიას, სადაც 2025 წელს ცხოვრების ღირებულების ინდექსი (Cost of Living Index) ყველაზე მაღალია. რეიტინგში ამჯერად მოხვდა 327 ქალაქი, სადაც საქართველოდან ორი ქალაქი - ბათუმი და თბილისი გვხვდება.
უფრო კონკრეტულად, ყველაზე ძვირი ქალაქების რეიტინგში თბილისი 236-ე ადგილზეა, ბათუმი კი 260-ე ადგილს იკავებს. ცნობისთვის, 2024 წლის დასაწყისში დედაქალაქი 255-ე და ზღვისპირა ქალაქი 286-ე ადგილზე იყო.
საქართველოში 4-სულიანი ოჯახის თვიური ხარჯი ქირის გარეშე 6 072 ლარია, ხოლო ერთი ადამიანის თვიური ცხოვრება ქირის გარეშე 1 683 ლარი ღირს. ამასთან, თბილისის ცენტრში ერთ საძინებლიანი ბინის ქირა საშუალოდ 1945 ლარი ღირს, ხოლო გარეუბანში 1 334 ლარი. ამასთან, 3-საძინებლიანი ბინის დედაქალაქის ცენტრში 3 845 ლარი, ხოლო გარეუბანში 2 194 ლარი ღირს. კვლევის მიხედვით, 1 კვ.მ ბინის ფასი დედაქალაქის ცენტრში 5 700 ლარი, ხოლო ქალაქგარეთ 3 074 ლარია.
რაც შეეხება ბათუმს, ზღვისპირა ქალაქში 4-სულიანი ოჯახის თვიური ხარჯი ქირის გარეშე საშუალოდ 5 403 ლარია, ხოლო ერთ სულიანი ოჯახის ხარჯი ქირის გარეშე 1 506 ლარი. კვლევის თანახმად, ბათუმში ცხოვრება ქირის გარეშე თბილისთან შედარებით 12.4%-ით იაფია, ხოლო ქირა 24.9%-ით იაფი.
ბათუმის ცენტრში 1-საძინებლიანი ბინის ქირა 1 482 ლარი, ხოლო გარეუბანში 1 027 ლარი ღირს. 3-საძინებლიანი ბინა ცენტრში 2 607 ლარი, ხოლო გარეუბანში 1 878 ლარია. ამასთან, 1 კვ.მ ბინის ფასი ბათუმის ცენტრში 3 667 ლარია, ხოლო გარეუბანში 2 478 ლარი.
Numbeo-ს კვლევის თანახმად, მსოფლიოს 10 საცხოვრებლად ყველაზე ძვირადღირებული ქალაქის ჩამონათვალი ასეთია:
- ციურიხი, შვეიცარია;
- ლოზანა, შვეიცარია;
- ჟენევა, შვეიცარია;
- ნიუ-იორკი, აშშ;
- ბაზელი, შვეიცარია;
- ბერნი, შვეიცარია;
- სან-ფრანცისკო, აშშ;
- ჰონოლულუ, აშშ;
- რეიკიავიკი, ისლანდია;
- ბოსტონი, აშშ.
ამასთან, კვლევაში მოხვედრილი 370 ქალაქიდან, ცხოვრება ყველაზე იაფი შემდეგ 10 ქალაქშია:
- კოიმბატორი, ინდოეთი;
- ალექსანდრია, ეგვიპტე;
- ლაჰორი, პაკისტანი;
- კარაჩი, პაკისტანი;
- ლუკნაუ, ინდოეთი;
- ჯაიპური, ინდოეთი;
- სურატი, ინდოეთი;
- კოჩი, ინდოეთი;
- ბუბანესვარი, ინდოეთი;
- კოლკატა, ინდოეთი.
