Tbilisi Dry Port-ის მშენებლობის პირველი ფაზა დასრულების ეტაპზეა. როგორც „ბიზნესპრესნიუსთან“ პორტის დირექტორი ნინო ნემსაძე აღნიშნავს, მშენებლობა უახლოესი 2 თვის განმავლობაში დასრულდება და ობიექტი მზად იქნება გახსნისთვის. ამ ეტაპზე მიმდინარეობს მეორე ფაზის მშენებლობის კონცეფციის შემუშავება.
ნემსაძის თქმით, პორტის პირველი ფაზის საკონტეინერო ტერმინალი 93 ათას კვადრატულ მეტრზეა მოწყობილი. ჯამში ტერმინალი 100-120 TEU-ს ტვირთს გაატარებს. მანვე აღნიშნა, რომ პირველი ობიექტის გახსნის შემდეგ პორტი ოპერირებას დაიწყებს.
„ტერიტორია არის გაყოფილი და სხვადასხვა ფაზის სამუშაოები პირველი ეტაპის შედეგად გახსნილ პორტს ხელს არ შეუშლის. პირველი ფაზის დასრულებისას გაიხსნება პორტი, დაიწყებს ოპერირებას, მეორე და მესამე ფაზების მშენებლობა და განვითარება კი ოპერირების პარალელურად იქნება შესაძლებელი. სამივე ფაზის დასრულების შემდეგ პორტში, დღევანდელი გათვლებით, 150 ადამიანამდე იქნება დასაქმებული“, - აღნიშნავს ნემსაძე.
მანვე აღნიშნა, რომ საკონტეინერო ინფრასტრუქტურის გარდა „თბილისის მშრალ პორტში“ მოეწყობა სასაწყობო მეურნეობაც.
„პორტი საქართველოსთვის უნიკალური პროექტია, ასეთი ტიპის ინფრასტრუქტურა მხოლოდ საპორტო ქალაქებშია. გარდა საკონტეინერო ინფრასტრუქტურისა, აქ განვითარდება დიდი სასაწყობო მეურნეობაც და რაც ყველაზე მნიშვნელოვანია, პირდაპირი სარკინიგზო კავშირი იქნება პორტებთან. ეს იძლევა საშუალებას, რომ კონტეინერების გადაზიდვა მოხდეს არა სახმელეთო გზით, არამედ რკინიგზით“, - განაცხადა ნინო ნემსაძემ.
შეგახსენებთ, Tbilisi Dry Port განლაგებულია კასპიის ზღვასა და შავ ზღვას შორის, შუა დერეფნის შუაგულში და ერთმანეთთან დააკავშირებს საქართველოს, თურქეთის, ბულგარეთისა და რუმინეთის შავი ზღვის პორტებს.
2024 წლის აგვისტოში ცნობილი გახდა, რომ AD Ports Group-ი Tbilisi Dry Port-ის 60%-იანი წილის მფლობელი გახდა. მაშინ AD Ports Group-ი იტყობინებოდა, რომ პროექტი სამ ფაზად განხორციელდება. პროცესების დასრულების შემდეგ ობიექტის საწყობი განლაგებული იქნება 100 000 კვ.მ-ზე და 286 ათას TEU საკონტეინერო ტვირთს გაატარებს.
საქართველოს სამეწარმეო რეესტრის მიხედვით, შპს „თბილისი დრაი პორტი" 2021 წელს დაფუძნდა. ამ დროისთვის კომპანიის 75% ფლობს „თბილისი დრაი პორტ ინვესტმენტი“, 25% კი „ვილჰელმსენ პორტ სერვისის ჯორჯიას“ ეკუთვნის. თავის მხრივ, „თბილისი დრაი პორტ ინვესტმენტში“ 80%-ს არაბთა გაერთიანებული საემიროებში რეგისტრირებული აბუ დაბის საპორტო კომპანია ფლობს, 20%-ს - „ინვეკო“. რაც შეეხება „ვილჰელმსენ პორტ სერვისის ჯორჯიას“, აქ 50%-იანი წილის მფლობელია „ინვეკო“, 50% კი ნორვეგიულ „ვილჰელმსენ პორტ სერვისის ეი.ეს“-ის საკუთრებაშია.
იხილეთ ასევე: „Tbilisi Dry Port-ის პირველი ფაზის მშენებლობა დასასრულს უახლოვდება“ - როდის გაიხსნება პორტი