ევროკავშირმა SWIFT-იდან გათიშული რუსული ბანკების სია გამოაქვეყნა - ჩამონათვალი
ევროკავშირმა უკრაინის ომის მესამე წლისთავთან დაკავშირებით სანქციების მე-16 პაკეტის გამოქვეყნებიდან რამდენიმე საათში იმ რუსული ბანკების სია გამოაქვეყნა, რომლებიც SWIFT-ის სისტემიდან გათიშა.
მანამდე ევროკომისიის პრესრელიზში ეს ბანკები არ სახელდებოდა და მხოლოდ ის ეწერა, რომ „ისინი წარმოადგენენ რეგიონულ ბანკებს, რომლებიც რუსეთის ფინანსური და საბანკო სისტემისთვის მნიშვნელოვან ინსტიტუტებად მიიჩნევა.“
სანქციების მე-16 პაკეტის ფარგლებში SWIFT-იდან გათიშული რუსული ბანკებია:
- Ak Bars Bank
- Uralsib
- Tochka Bank
- National Reserve Bank
- Roseximbank
- Sinara Bank
- Primsotsbank
- BBR-bank
- Kuznetskbusinessbank
დოკუმენტის თანახმად, ბანკები SWIFT-იდან 17 მარტს გაითიშება.
მათ გარდა, SWIFT-იდან არასაბანკო ანგარიშსწორების საკრედიტო დაწესებულება, Payment Constructor გაითიშება, რომელიც გადახდებს იღებს და გადახდის სერვისს, მათ შორის, იურიდიულ პირებს უწევს.
მეცამეტე ინსტიტუტი, რომელიც SWIFT-იდან ჩაიხსნება, ასევე, არასაბანკო ორგანიზაცია სანკტ-პეტერბურგის ანგარიშსწორების ცენტრია. მას, Payment Constructor-ის მსგავსად, რუბლებსა და უცხოურ ვალუტაში საბანკო ოპერაციების განხორციელების ლიცენზია აქვს.
სანქციებს, ასევე, Mfk Tochka Opory დაექვემდებარა, რომელიც საბითუმო არასპეციალიზებულ ვაჭრობას, კერძოდ, მიკროსქემების, სენსორების, ინფორმაციის შეყვანა-ასახვის მოწყობილობებისა და სხვა ელექტრონული კომპონენტების მიწოდებას ეწევა.
ცნობისთვის: უკრაინის ომის დაწყების შემდეგ რუსული ბანკები SWIFT-თან თანმიმდევრობით ითიშებიან. კერძოდ, სისტემიდან გათიშულია Sberbank, VTB, Rosselkhozbank, Promsvyazbank, Sovcombank და სხვები. რუსეთის სახელმწიფო ბანკებიდან “გაზპრომბანკი” ერთადერთი და ბოლო ინსტიტუტია, რომელიც დოლარში ანგარიშსწორებასა და SWIFT-ის სისტემაზე წვდომას ინარჩუნებს. თუმცა გასული წლის ნოემბერში ბანკების წინააღმდეგ აშშ-ის სანქციების ბოლო რაუნდი 50 საკრედიტო ინსტიტუტს, მათ შორის, “გაზპრომბანკსაც” შეეხო.
მოამზადა ლადო სულაბერიძემ