პუტინის ნათესავები, პოზნერი, კადიროვის ფონდი - კანადამ რუსეთის წინააღმდეგ ახალი სანქციები დააწესა
ევროკავშირის, ავსტრალიისა და დიდი ბრიტანეთის შემდეგ რუსეთის წინააღმდეგ სანქციების სია კანადის ხელისუფლებამაც გააფართოვა.
ინფორმაცია კანადის მთავრობის ვებგვერდზე ვრცელდება.
უკრაინაში ომის დაწყებიდან მესამე წლისთავზე გამოქვეყნებული ახალი შეზღუდვები 70-ზე მეტ ფიზიკურ პირსა და კომპანიას, ასევე, რუსეთის 100-ზე მეტ „ჩრდილოვან“ ტანკერს შეეხო.
კანადის სანქციების ქვეშ მოხვდა:
- პუტინის ნათესავი და თავდაცვის მინისტრის ამჟამინდელი მოადგილე, ანა ცივილევა, მისი ვაჟი დიმიტრი ლოგინოვი და მეუღლე, რუსეთის ენერგეტიკის მინისტრი, სერგეი ცივილევი
- ინტერნეტის განვითარების ინსტიტუტის ხელმძღვანელი, ალექსეი გორესლავსკი
- ჟურნალისტი და ტელეწამყვანი, ვლადიმერ პოზნერი
- რუსეთის სათხილამურო შეჯიბრების ფედერაციის პრეზიდენტი, ელენა ვალბე
- პრიმორსკის მხარის გუბერნატორი, ოლეგ კოჟემიაკო
- კომპანია “რუსული სპილენძის” დამფუძნებელი, მილიარდერი, იგორ ალტუშკინი
- პოლიტტექნოლოგი, ილია ღამბაშიძე
- არასმთავრობო ორგანიზაცია “დიალოგის” აღმასრულებელი დირექტორი, ვლადიმერ ტაბაკი და სხვები.
კანადის მთავრობის შეფასებით, სასანქციე სიის ახალი ფიგურანტები მხარს უჭერენ რუსეთის შეჭრას უკრაინაში და რუსეთის სამხედრო-სამრეწველო კომპლექსს ეხმარებიან; ასევე, მონაწილეობენ „უკრაინელი ბავშვების უკანონო დეპორტაციასა და იძულებით გადაადგილებაში დროებით ოკუპირებულ ტერიტორიებზე ან საზოგადოებრივი აზრის მანიპულირების მიზნით რუსეთს პროპაგანდის გავრცელებაში ხელს უწყობენ.“
სანქციები, ასევე, დაუწესდა:
- რუსეთის საჰაერო-კოსმოსურ ძალებს
- რადიაციული, ქიმიური და ბიოლოგიური თავდაცვის ძალებს
- ახმატ კადიროვის ფონდს
- კომპანია “რუსულ სპილენძს”
- ბავშვთა ბანაკ “არტეკს”
- არასამთავრობო ორგანიზაცია “დიალოგს”
- რუსეთის "ჩრდილოვანი ფლოტის" 109 გემს, რომელთაგან ყველაზე ძველი 1978 წელს აშენდა
კანადის პრემიერ-მინისტრ ჯასტინ ტრუდოს განცხადებით, ახალი შეზღუდვები შემოღებულ იქნა რუსეთზე ზეწოლის შესანარჩუნებლად და სიაში ის პირები და ორგანიზაციები მოხვდნენ, რომლებიც „კრემლის სამხედრო-სამრეწველო ბაზას მხარს უჭერენ.“
ცნობისთვის: 24 თებერვალს დიდმა ბრიტანეთმა უკრაინის ომის შემდეგ ანტირუსული სანქციების ყველაზე დიდი პაკეტები დაამტკიცა. ახალი შეზღუდვები, ასევე, ავსტრალიამ გამოაცხადა, ხოლო ევროკავშირმა რუსეთის წინააღმდეგ სანქციების მე-16 პაკეტი მიიღო.
მოამზადა ლადო სულაბერიძემ