ჩვენ უბრალოდ, ვცხოვრობთ სტიქიიდან სტიქიამდე, მერე ეს ყველაფერი გვავიწყდება - ჩხობაძე
„ჩვენ ერთი სტიქია კი არ გვაქვს, რამდენიმე სტიქია გვაქვს. ზვავსაშიშროება გვაქვს, ხანძრები, გვალვები, წყალდიდობები, მეწყრები - ეს ყველაფერი მოსალოდნელია”,- ამის შესახებ ორგანიზაცია „საქართველოს მწვანეები - დედამიწის მეგობრების“ თავმჯდომარემ, ნინო ჩხობაძემ „პალიტრანიუსის“ გადაცემა „360 გრადუსში“ განაცხადა.
მისი თქმით, დღეს უკვე უნდა დავიწყოთ მზადება წყალდიდობების და მეწყრებისთვის იმ რეგიონებში, სადაც უხვი თოვლია.
„დღეს უკვე უნდა დავიწყოთ მზადება წყალდიდობების და მეწყრებისთვის იმ რეგიონებში, სადაც უხვი თოვლია. ჩათვალეთ, რომ გაზაფხული უკვე დამდგარია. უკვე უნდა დაიწყონ მზადება, რადგან პრობლემა დადგება.
მომავალ კვირაში დაბალი ტემპერატურებია, ამიტომ მოლიპვა და ყინული უფრო საშიშია, თოვლი მძიმდება. წამებს და დროს აქვს დიდი მნიშვნელობა. მოსახლეობა, რომელიც გამოსაყვანია, უნდა გამოიყვანონ“, - განაცხადა ჩხობაძემ.
მისივე თქმით, მთავრობას არ აქვს სტიქიასთან ბრძოლის პროტოკოლი, რადგან სხვა შემთხვევაში რეაგირება პირველივე დღიდან დაიწყებოდა.
„მგონი, სტიქიასთან ბრძოლის პროტოკოლი არ გვაქვს იმიტომ, რომ გვქონდეს პირველივე დღიდან დაიწყებოდა რეაგირება. რეაგირების სქემები, რომელიც უნდა არსებობდეს კანონის მიხედვით, ყველა სამსახურს უნდა ჰქონოდა. მე ვიცი, რომ მუნიციპალიტეტებს თავისი რეაგირების გეგმები კანონით ევალებათ, მაგრამ ასეთი გეგმები ბევრ მუნიციპალიტეტში არ არის გაკეთებული. ეს არის უსაფრთხოების ნორმა: როგორ მოდის შეტყობინება, ვინ იღებს ინფორმაციას, სააგენტოდან ინფორმაციის მიღებისთანავე უნდა დაიწყოს მობილიზება - ტექნიკის მობილიზება, გადახედვა. ყველა სტიქიას აქვს თავისი ქმედება.
ყველა უწყება როდის და როგორ ერთვება, ადგილობრივი ხელისუფლება რას აკეთებს, რას აკეთებს მოხალისე, მასზეც გაფრთხილების სისტემა უნდა მოქმედებდეს, მარტო 112-დან მიღებული შეტყობინება არაფერს ნიშნავს, მას უნარ-ჩვევები უნდა ჰქონდეს როგორ მოიქცეს, რა უნდა მოიმარაგოს.
მუნიციპალიტეტებს ტექნიკა არ ჰყოფნის. ყველა რეგიონს უჭირს ახლა, გარდა თბილისისა. ძალიან ცოტაა მძიმე ტექნიკა, რომელიც საქართველოს სჭირდება.
ჩვენ ერთი სტიქია კი არ გვაქვს, რამდენიმე სტიქია გვაქვს, ზვავსაშიშროება გვაქვს, ხანძრები, გვალვები, წყალდიდობები, მეწყრები - ეს ყველაფერი მოსალოდნელია. ჩვენ უბრალოდ ვცხოვრობთ სტიქიიდან სტიქიამდე, როდესაც სტიქია ჩაივლის, ეს ყველაფერი გვავიწყდება. ამას სისტემური მიდგომა სჭირდება და არ შეიძლება ერთმანეთზე გადაბრალება. პირველ რიგში, სისტემა უნდა არსებობდეს“, - განაცხადა ჩხობაძემ.
შეგახსენებთ, რომ მე-7 დღეა გურიაში მოსახლეობა სტიქიას ებრძვის. დიდთოვლობის გამო ჩამონგრეულია 50-მდე სახლი, არ არის ელექტროენერგია, წყალი, მედიკამენტები, გზების გაწმენდა ვერ ხერხდება. სოციალურ ქსელში არაერთი ინფორმაცია იწერება იმის შესახებაც, რომ ოჯახებს საკვები გამოელიათ. სამწუხაროდ, არის მსხვერპლიც.
