ირაკლი ღარიბაშვილს და თეა წულუკიანს სახელმწიფო დაცვა დაენიშნათ - რა გახდა მიზეზი
მთავრობის გადაწყვეტილებით, ირაკლი ღარიბაშვილს და თეა წულუკიანს სახელმწიფო დაცვა დაენიშნათ. ამის შესახებ ირაკლი კობახიძის მიერ 12 მარტს ხელმოწერილი განკარგულება მთავრობის ვებ-გვერდზე უკვე გამოქვეყნდა.
„ირაკლი ღარიბაშვილს დაენიშნოს/ გაუგრძელდეს სახელმწიფო დაცვა, შესაბამისი წინაპირობებიდან გამომდიწარე საჭიროების გასვლამდე, 2026 წლის 1-ელ აპრილამდე პერიოდში, სანელმწიფო დაცვის მინიმალური სტანდარტების შესაბამისად.
თეა წულუკიანს დაენიშნოს/ გაუგრძელდეს სახელმწიფო დაცვა, შესაბამისი წიწაპირობებიდან გამომდინარე საჭიროების გასვლამდე, 2026 წლის 1-ელ აპრილამდე პერიოდში, სახელმწიფო დაცვის მინიმალური სტანდარტების შესაბამისად,“ - აღნიშნულია განკარგულებაში.
ცნობისთვის, როგორც ირაკლი კობახიძის განკარგულებაშია აღნიშნული, ირაკლი ღარიბაშვილისთვის სახელმწიფო დაცვის სამსახურის დანიშვნის საფუძველი გახდა მთავრობის დადგენილების პუნქტი, რომელიც გულისხმობს შემდეგს:
- მთავრობის განკარგულების საფუძველზე სახელმწიფო დაცვა შეიძლება დაენიშნოს პრემიერ-მინისტრს, პრეზიდენტს, პარლამენტის თავმჯდომარეს უფლებამოსილების ვადის გასვლიდან 1 წლის შემდეგ ან უფლებამოსილების შეწყვეტიდან 1 წლის შემდეგ, თუ მისი უფლებამოსილების შეწყვეტა არ არის საქართველოს კონსტიტუციის დარღვევის ან დანაშაულის ჩადენის შედეგი და არსებობს საკმარისი მონაცემები ან შესაბამისი სამსახურებიდან მიღებულია ინფორმაცია, რომ მის სიცოცხლესა და ჯანმრთელობას საფრთხე ემუქრება.
რაც შეეხება თეა წულუკიანს, როგორც განკარგულებაშია აღნიშნული, ამ შემთხვევაში გადაწყვეტილების საფუძველი გახდა კანონით განსაზღვრული შემდეგი ნორმა:
- მთავრობის განკარგულების საფუძველზე სახელმწიფო დაცვა შეიძლება დაენიშნოს პარლამენტის წევრს, მთავრობის წევრს, სხვა სახელმწიფო უწყების ხელმძღვანელს ან/და სახელმწიფო ხელისუფლების სხვა მაღალი რანგის თანამდებობის პირს, რომლებიც არ არიან გათვალისწინებულნი ამ ნუსხის პირველი პუნქტით, სამსახურებრივი უფლებამოსილების პერიოდში, აგრეთვე მათი ოჯახის წევრებს, თუ არსებობს საკმარისი მონაცემები ან შესაბამისი სამსახურებიდან მიღებულია ინფორმაცია, რომ მის ან მისი ოჯახის წევრების სიცოცხლესა და ჯანმრთელობას საფრთხე ემუქრება.