საქართველო რუსეთის ბიზნესტურიზმის ტოპ 10-ულშია
საქართველო რუსეთის ბიზნესტურიზმის უცხოეთის მიმართულებებში ტოპ 10-ეულს ხურავს. ამის შესახებ ტუროპერატორ Ostrovok Komandirovk-ის მონაცემებში წერია, რასაც რუსული “კომერსანტი” ავრცელებს.
კერძოდ, გასული წლის ზამთრის სეზონზე ქვეყანაში რუსების საქმიანი ვიზიტებისას ერთი ღამის ღირებულება, მინიმუმ, 97 დოლარს (8,200 რუბლს) შეადგენდა, რაც, 2023 წლის ზამთრის ფასებთან შედარებით, 1%-ით ნაკლებია.
საქმიანი რუსი ვიზიტორებისთვის, რომლებიც საცხოვრებელს ზამთარში ჯავშნიდნენ, უცხოური ქვეყნების ტოპ 10-ეული ასეთია:
- ჩინეთი - ღამის ღირებულება 148 დოლარი (ღირებულების ცვლილება წელიწადში +2%-ით)
- არაბეთის გაერთიანებული საემიროები - 417 დოლარი (-4%)
- თურქეთი - 147 დოლარი (+10%)
- ტაილანდი - 214 დოლარი (+35%)
- ბელარუსი -101 დოლარი (+18%)
- ყაზახეთი 108 დოლარი (უცვლელი)
- იტალია - 304 დოლარი (+11%)
- უზბეკეთი 135 დოლარი (+30%)
- საფრანგეთი 356 დოლარი (+43%)
- საქართველო - 97 დოლარი (-1%)
რუსეთის ბიზნესტურიზმის ბაზრის საზღვარგარეთის მიმართულებებზე ჯავშნების რაოდენობა გასულ ზამთარს წლიურად 40%-ზე მეტად გაიზარდა. ამის გამო ავიაჯავშნების სტრუქტურაში უცხოური მიმართულებების წილმა წლის განმავლობაში 10%-დან 11,5%-მდე მოიმატა.
მიმდინარე წლის განმავლობაში რუსეთის ბიზნესტურიზმის ბაზარი შესაძლოა, 25-30%-ით გაიზარდოს.
ექსპერტების შეფასებით, უცხო ქვეყნებში მივლინებების რაოდენობით ბიზნესსექტორების ტოპ 3-ეულში პირველად მოხვდნენ საავტომობილო და მანქანათმშენებლობის კომპანიები, რომელთა აქტივობაც წლიურად 73%-ით გაიზარდა. ანალიტიკოსების აზრით, საქართველოს მსგავს პოსტსაბჭოთა და აზიის ქვეყნებში რუსების საქმიანი ვიზიტები ხშირად მასშტაბირებასა და ახალი ფილიალების გახსნას უკავშირდება.
მოამზადა ლადო სულაბერიძემ