ქართული ღვინის ექსპორტში რუსეთის წილი შემცირდა
2025 წლის იანვარ-თებერვალში, გასული წლის იმავე პერიოდთან შედარებით, ქართული ნატურალური ღვინის ექსპორტი 43%-ით შემცირდა.
უფრო კონკრეტულად, წელს იანვარ-თებერვალში ექსპორტზე გავიდა 9 580 ტონა ქართული ღვინო, რომლის ღირებულებამაც 29.2 მლნ დოლარი შეადგინა. რაც შეეხება 2024 წელს, პირველ ორ თვეში ექსპორტირებული იყო 47.3 მლნ დოლარის ღირებულების 16 664 ტონა ღვინო.
ამასთანავე, მცირედით გაიზარდა ქართული ღვინის საშუალო საექსპორტო ფასი გადასახადების გარეშე. კერძოდ, 1 ლიტრის საშუალო ფასი 2025 წლის იანვარ-თებერვალში 3 დოლარი იყო, წინა წლის იმავე პერიოდში კი 2.83 დოლარს შეადგენდა.
ფასის ფორმირებაში ძირითადი წვლილი შეიტანა ყაზახეთში ღვინის ექსპორტის გაძვირებამ. კერძოდ, შარშან ყაზახეთში ღვინის საშუალო საექსპორტო ფასი გადასახადების გარეშე 3.2 დოლარი იყო, წელს იმავე პერიოდში კი 3.57 დოლარამდე გაიზარდა.
2025 წლის იანვარ-თებერვალში ღვინო ყველაზე მეტი მოცულობით შემდეგ 5 ქვეყანაში გავიდა:
- რუსეთი - 16.07 მლნ დოლარის 5 644 ტონა (1 ლიტრი საშუალოდ 2.84 დოლარი);
- პოლონეთი - 2.23 მლნ დოლარის 949 ტონა (1 ლიტრი საშუალოდ 2.4 დოლარი);
- უკრაინა - 1.73 მლნ დოლარის 628 ტონა (1 ლიტრი საშუალოდ 2.75 დოლარი);
- ყაზახეთი - 2.01 მლნ დოლარის 564 ტონა (1 ლიტრი საშუალოდ 3.57 დოლარი);
- ჩინეთი - 1.57 მლნ დოლარის 543 ტონა (1 ლიტრი საშუალოდ 2.9 დოლარი).
აღსანიშნავია ისიც, რომ ღვინის ექსპორტის შემცირება გამოწვეული იყო რუსეთის ფაქტორით. კერძოდ, მონაცემები აჩვენებს, რომ რუსეთში ქართული ღვინის ექსპორტი 59%-ით არის შემცირებული. წელს თუ 5 644 ტონა ღვინო გავიდა რუსეთში, შარშან საანგარიშო პერიოდში 13 206 ტონა ღვინის ექსპორტი განხორციელდა (ჯამში 36 მლნ დოლარის). მოცულობის კლების პარალელურად, რუსეთის წილი ღვინის ექსპორტში 79%-დან 59%-მდეა შემცირებული.
