ინდოეთში ქართული პროდუქციის ექსპორტი 12-ჯერ გაიზარდა - რას ვყიდით და ვყიდულობთ
საქსტატის მიხედვით, მიმდინარე წლის იანვარ-თებერვალში, წინა წლის ამავე პერიოდთან შედარებით, საქართველოდან ინდოეთში ექსპორტის საერთო ღირებულება თითქმის 5-ჯერ არის გაზრდილი.
სტატისტიკის თანახმად, 2025 წლის 2 თვეში ინდოეთში 4.301 მლნ აშშ დოლარის ღირებულების პროდუქტი გავიდა, რაც, გასული წლის იანვარ-თებერვალთან შედარებით, 4.7-ჯერ მეტია - 917 180 აშშ დოლარი. კიდევ უფრო, 12-ჯერ, არის გაზრდილი ადგილობრივი ექსპორტის წილი - 321 000 აშშ დოლარიდან 3.91 მლნ-მდე.
რაც შეეხება იმპორტს, 11.9 მლნ აშშ დოლარიდან 16.7 მლნ აშშ დოლარამდეა გაზრდილი მისი მაჩვენებელიც. შესაბამისად, ვხედავთ, რომ ინდოეთთან, ზოგადად, სავაჭრო პარტნიორობის დინამიკის მასშტაბია მზარდი - 2024-ის იანვარ-თებერვალში ქვეყნებს შორის ბრუნვა 12.816 მლნ აშშ დოლარი იყო, წელს კი - 20.968 მლნ
2025 წლის იანვარ-თებერვალში ინდოეთში საერთო ექსპორტის უდიდესი წილი (90.9%) ადგილობრივ ექსპორტზე მოდის. ყველაზე დიდი რაოდენობით კი, ადგილობრივი პროდუქციიდან, სასუქები გავიდა - 3.838 მლნ აშშ დოლარი; 31.6 ათასი დოლარის ალუმინის ჯართი და 26.9 ათასი დოლარის სპილენძის ჯართი.
2025 წლის იანვარ-თებერვალში ტოპ 5 იმპორტირებული პროდუქტი ინდოეთიდან:
- ფარმაცევტული პროდუქცია (სამკურნალო საშუალებები დაფასოებული) - 2.126 მლნ. აშშ დოლარი
- ბირთვული რეაქტორები, დანადგარები და მექანიკური მოწყობილობები და მათი ნაწილები - 1.772 მლნ. აშშ დოლარი
- მარცვლოვანები - 1.487 მლნ. აშშ დოლარი
- ელექტრული მანქანები და მოწყობილობები, მათი ნაწილები და საკუთნოები - 982.53 ათასი აშშ დოლარი
- ფარმაცევტული პროდუქცია (ვაქცინები, სისხლი და იმუნური პროდუქტები) – 850.55 ათასი აშშ დოლარი
