სუს-დან მთავრობაში - როგორია გრიგოლ ლილუაშვილის ქონება და ფინანსური მდგომარეობა
გრიგოლ ლილუაშვილი, რომელიც დღემდე სახელმწიფო უსაფრთხოების სამსახურის უფროსის თანამდებობას იკავებდა, რეგიონული განვითარების სამინისტროს უხელმძღვანელებს.
როგორც პრემიერ მინისტრმა ირაკლი კობახიძემ ბრიფინგზე განაცხადა, რეგიონული განვითარებისა და ინფრასტრუქტურის სამინისტრო გაიყოფა და ორ ცალკე უწყებად ჩამოყალიბდება.
მისივე თქმით, სწორედ რეგიონული განვითარების მინისტრის პოზიციას დაიკავებს გრიგოლ ლილუაშვილი, რომელმაც სახელმწიფო უსაფრთხოების სამსახურის უფროსის თანამდებობა უკვე დატოვა. ინფრასტრუქტურის სამინისტროს კი კვლავ ირაკლი ქარსელაძე უხელმძღვანელებს.
„ბიზნესპრესნიუსი“ დაინტერესდა რა ქონებას ფლობს გრიგოლ ლილუაშვილი.
როგორც ცნობილია, თანამდებობის პირების ქონებრივი დეკლარაციები ანტიკორუფციული ბიუროს ვებ-გვერდზე უნდა იყოს საჯაროდ ხელმისაწვდომი, თუმცა, რამდენიმე თვეა დეკლარაციები საიტზე ხელმისაწვდომი არ არის. ამის მიზეზად კი ვებ-გვერდის ტექნიკური სამუშაოები სახელდება.
თუმცა, სანამ ეს დეკლარაციები ჯერ კიდევ საჯაროდ იყო ხელმისაწვდომი, არასამთავრობო ორგანიზაციამ IDFI-მ მოამზადა თანამდებობის პირების ქონებრივი დეკლარაციების ბაზა, სადაც თავმოყრილია 2017-2024 წლების (პორტალზე წვდომის სრულად შეზღუდვამდე) თანამდებობის პირთა მიერ შევსებულ დეკლარაციები.
შესაბამისად, ამ ბაზაზე დაყრდნობით, 2024 წლის 28 მარტს შევსებული ქონებრივი დეკლარაციის მიხედვით, გროგოლ ლილუაშვილის საკუთრებაში მხოლოდ ერთი ბინაა. საუბარია, თბილისში მდებარე ბინაზე, რომელიც 2013 წელს 125 00 აშშ დოლარად აქვს შეძენილი.
ამასთან, დოკუმენტის თანახმად, მისი მეუღლის სახელზეა რეგისტრირებული მსუბუქი ავტომობილი toyota rav4, რომელშიც 2021 წელს 10 500 აშშ დოლარი გადაიხადა.
რაც შეეხება ფინანსურ მდგომარეობას, გრიგოლ ლილუაშვილს დეკლარაციის შევსების მომენტში საბანკო ანგარიშზე ჰქონდა 23 433 ლარი და 15 000 ევრო.
ამასთან, დეკლარაციის მიხედვით, 2023 წელს გრიგოლ ლილუაშვილს სახელმწიფო უსაფრთხოების სამსახურის უფროსის თანამდებობაზე ხელფასის სახით აღებული აქვს 126 299 ლარი.
