ვინ არიან და რა ქონებას ფლობენ რუსი მილიარდერები, რომლებმაც მოქალაქეობა შეიცვალეს - Forbes-ის რეიტინგი
Forbes-ის მილიარდერთა განახლებულ მსოფლიო რეიტინგში 24 რუსი მილიარდერია, რომელმაც რუსეთის მოქალაქეობა შეიცვალა.
The Moscow Times-ის გამოთვლით, ამ მილიარდერების ერთობლივი ქონება, თითქმის, 110 მლრდ დოლარს შეადგენს.
მოქალაქეობაგამოცვლილი რუსი მილიარდერები ამჯერად შემდეგ ქვეყნებს წარმოადგენენ:
- ალექსეი კუზმიჩევი (7,5 მლრდ დოლარი), Alfa Group-ის თანადამფუძნებელი - საფრანგეთი
- პეტრ ავენი (4,7 მლრდ დოლარი), Alfa Bank-ის ყოფილი პრეზიდენტი - ლატვია
- ელენა ბატურინა (1,3 მლრდ დოლარი), საინვესტიციო-სამშენებლო კორპორაცია Inteko-ს დამფუძნებელი - დიდი ბრიტანეთი
- ლეონიდ ფედუნი (10,4 მლრდ დოლარი), “ლუკოილის” ყოფილი ვიცეპრეზიდენტი - მონაკო
- ვიაჩესლავ კანტორი (9,5 მლრდ დოლარი), Akron-ის აქციონერი - ისრაელი
- არკადი ვოლოჟი (1,2 მლრდ დოლარი) Yandex-ის თანადამფუძნებელი - ისრაელი
- ალექსანდრე მამუტი (1,4 მლრდ დოლარი) Rambler Group-ის ყოფილი თანამფლობელი - ისრაელი
2025 წლის რეიტინგში ქვეყანაგამოცვლილი ყველაზე მეტი რუსი მილიარდერი ამჟამად შვეიცარიის წარმომადგენელია. ესენი არიან: მიხაილ პროხოროვი (10,7 მლრდ დოლარი), ეგორ კულკოვი (4,1 მლრდ), ვლადიმირ და ნიკოლაი ფარტუშნიაკები (1,9 და 1,5 მლრდ დოლარი), ალექსანდრ მიხალსკი (1,3 მლრდ), ოლეგ ბოიკო (1,5 მლრდ), ანდრეი რაპოპორტი (1,2 მლრდ) და იური შეფლერი (1,1 მლრდ).
ამასთან, არაბთა გაერთიანებულ საამიროებს ამჟამად ანდრეი მელნიჩენკო (17,4 მლრდ) და მიშელ ლიტვაკი (2,5 მლრდ) წარმოადგენენ. ალიშერ უსმანოვი (16,7 მლრდ) უზბეკეთიდანაა, გავრილ იუშვაევი (1,9 მლრდ) ისრაელს წარმოადგენს, დმიტრი რიბოლოვლევი (6,4 მლრდ) მონაკოსთან, ხოლო დენის შტენგელოვი (1,4 მლრდ) ავსტრალიასთან არის დაკავშირებული.
კვიპროსს Forbes-ის 2025 წლის სიაში სამი რუსი მილიარდერი, სერგეი ლომაკინი (1,2 მლრდ), გლებ ფეტისოვი (1,3 მლრდ) და არტემ ხაჩატრიანი (1,6 მლრდ) წარმოადგენენ.
ოფიციალურად რუსეთის მოქალაქეობაზე უარი, მინიმუმ, ექვსმა მილიარდერმა თქვა. მათ შორის არიან Revolut-ის თანადამფუძნებელი, ნიკოლაი სტორონსკი, ჰოლდინგ Freedom-ის მფლობელი, ტიმურ ტურლოვი და საინვესტიციო კომპანია DST Global-ის დამფუძნებელი, იური მილნერი.
რუს მილიარდერებს შორის მოქალაქეობის შეცვლის ტენდენცია უკრაინაში ომის დაწყების შემდეგ საგრძნობლად გაიზარდა, როცა სანქციების გამო რუსული პასპორტი დასავლეთში ბიზნესის საწარმოებლად სერიოზულ დაბრკოლებად გადაიქცა.
მოამზადა ლადო სულაბერიძემ