„პირველი წელი განსაკუთრებით კრიტიკულია, 20 სტარტაპიდან მხოლოდ 1 რჩება“ –„ენაგრამი“
„პირველი წელი განსაკუთრებით კრიტიკულია, 20 სტარტაპიდან მხოლოდ 1 რჩება“,- ამის შესახებ „ენაგრამის“ დამფუძნებელმა რატი სხირტლაძემ „ბიზნესპრენიუსთან“ ისაუბრა.
აღნიშნულით ის, მთავრობის ინიციატივას გამოეხმაურა, რომლის მიხედვითაც სტარტაპერების ნაწილი საშემოსავლო გადასახადისგან გათავისუფლდება. კერძოდ, საუბარია იმ დამწყებ ბიზნესებზე, რომლებიც მაღალტექნოლოგიურ და ინოვაციურ პროდუქტებს ქმნიან. მთავრობის გადაწყვეტილებით, მათ 10 წლის განმავლობაში საგადასახადო შეღავათები ექნებათ, ხოლო, 3 წელი ნულოვანი საშემოსავლო.
როგორც „ენაგრამის“ დამფუძნებელ ამბობს, საშემოსავლოს მოხსნა, სტარტაპერების გადარჩენის შანსებს ზრდის.
„საშემოსავლო გადასახადი არის ძალიან მნიშვნელოვანი. როდესაც სტარტაპერი იწყებს მუშაობას, პრაქტიკულად, ეს არის ერთადერთი გადასახადი, რომელსაც ის სახელმწიფოს უხდის, მოგების გადასახადამდე ვერც მიდის. სტარტაპერებისთვის პირველი წელი განსაკუთრებით კრიტიკულია, ამ პერიოდში, 20 სტარტაპიდან, როგორც წესი, 1 რჩება.
ძირითადი მიზეზია ის, რომ ის ფინანსური რესურსი, რაც იყო თავიდან გათვლილი, არ არის საკმარისი. ახლა საშემოსავლო გადასახადის გადახდა თუ არ მოუწევთ, ეს სტარტაპის გადარჩენის შანსებს ზრდის. შესაბამისად, გადარჩენილი სტარტაპი გაცილებით მეტ შემოსავლებს მოუტანს ქვეყნის ბიუჯეტს და ეკოსისტემას, ვიდრე მის მიერ პირველ წელს გადახდილი 20%“,- ამბობს რატი სხირტლაძე.
