„1 კილომეტრი ხაზის მიწისქვეშა მეტროს მშენებლობა სავარაუდოდ, 70-80 მილიონი დოლარი დაჯდება“

ამ ეტაპზე, მეტროს ძირითადი ხაზის დაგრძელების პროექტთან დაკავშირებით ბაზრის კვლევა გამოცხადებულია - ეს პროექტი მოიცავს, როგორც გლდანის, ასევე ვარკეთილის მიმართულების ხაზის დაგრძელებას, - ამის შესახებ თბილისის სატრანსპორტო კომპანიის გენერალურმა დირექტორმა, გიორგი შარკოვმა განაცხადა, რითაც მეტროსადგურების ქსელის გაფართოების საკითხს გამოეხმაურა.

მისივე თქმით, მეტროსადგურების დაგრძელება ხელს შეუწყობს ბოლო სადგურების განტვირთვას.

"1 კმ მეტროს ხაზის მშენებლობა 70-80 მლნ დოლარი დაჯდება"

„ამ ეტაპზე, პირველი ძირითადი ხაზის დაგრძელების პროექტთან დაკავშირებით ბაზრის კვლევა გამოცხადებულია. ეს პროექტი იგეგმება და მოიცავს ორივე მიმართულებით, ანუ როგორც გლდანის, ასევე ვარკეთილის მიმართულების ხაზის დაგრძელებას. ქალაქი ვითარდება, ხოლო მეტრო კომუნისტების დროსაა აშენებული და ის მორგებული იყო, იმ პერიოდში იმ განაშენიანებაზე, რაც მაშინ დაგეგმილი იყო. შესაბამისად, მარტივად რომ გადავხედოთ იგივე გლდანს ან ვარკეთილს, მეტროების ბოლო გაჩერებები, სადგურები ისედაც გადატვირთულია. გარდა ამისა, უშუალოდ ეს სადგურები დასახლების თავშია და მთელი ნაკადი მოედინება ბოლო სადგურებზე. სტატისტიკასაც რომ გადავხედოთ, მარტივი განსასაზღვრია, რომ ყველაზე გადატვირთული სწორედ, ეს ბოლო სადგურებია. შესაბამისად, ეს დაგრძელებები ხელს შეუწყობს ბოლო სადგურების განტვირთვას. გარდა ამისა, რა თქმა უნდა, კომფორტი და მომსახურების ხარისხი მგზავრებისთვის გაიზრდება.

რაც შეეხება ახალ სადგურებს, ადგილები ჩვენს მიერ კონცეპტუალურად შერჩეულია, მაგრამ რა თქმა უნდა, ისევ და ისევ დეტალური პროექტირების ეტაპზე განისაზღვრება, ეს სადგურები სად გაკეთდება. შესაბამისად, ამ სადგურების ამოსასვლელები. ამ ეტაპზე ნაადრევია ამ თემაზე საუბარი“, - განაცხადა შარკოვმა.

მისივე თქმით, ბაზრის კვლევა აჩვენებს, თბილისის მერიას მიწისქვეშა განლაგების მშენებლობა რა დაუჯდება.

„ბოლო სამი-ოთხი წლის წინ მოძიებული ფასებით, 1 კილომეტრი ხაზის მშენებლობა მიწისქვეშა განლაგების 60-დან 100 მილიონ დოლარამდე ჯდებოდა… ჩვენი პროექტის შემთხვევაში ბაზრის კვლევა აჩვენებს, მაგრამ ჩვენ [1 კილომეტრის ხაზის მშენებლობა] 70-80 მილიონი დოლარის ფარგლებში ვარაუდობთ”, - განაცხადა შარკოვმა.

შარკოვის განმარტებით, ახლა მიმდინარეობს პროექტი ახმეტელის თეატრის და მარჯანიშვილის მეტროსადგურის მეორე ამოსასვლელის მოწყობასთან დაკავშირებით.

„რაც შეეხება უკვე არსებულ ინფრასტრუქტურას. ახლა მიმდინარეობს პროექტი ახმეტელის თეატრის [მეტროსადგურის] მეორე ამოსასვლელის და მარჯანიშვილის მეტროსადგურის მეორე ამოსასვლელის მოწყობასთან დაკავშირებით, სადაც ჯერ კიდევ კომუნისტების პერიოდში გვირაბები გათხრილი იყო, მაგრამ პროექტები დაუსრულებელი. ჩვენ ვიმედოვნებთ, რომ ამ მიმართულებითაც მალე პროგრესი გვექნება და ეს ამოსასვლელებიც ამუშავდება, რაც ასევე ხელს შეუწყობს სადგურების განტვირთვას“, - აღნიშნა შარკოვმა.

ამასთან, შარკოვმა ჟურნალისტებთან 12-ვე მეტროსადგურის მოდერნიზებასთან დაკავშირებით ისაუბრა. მისი თქმით, მერია იმედოვნებს, რომ სამუშაოებზე და დეტალურ პროექტირებაზე შემდეგი წლის დასაწყისში ხელშეკრულებას დადებენ.

„12 მეტროსადგურის რეაბილიტაციის პროექტთან დაკავშირებით ტენდერი მიმდინარეობს. ამ ეტაპზე, მიმდინარეობს შეფასება, რომელიც მალე დასრულდება. ფინანსური წინადადებებიც უკვე გაიხსნა. ბანკთან უკვე თანხმდება გამარჯვებულის გამოვლენის საკითხი, ამ ტენდერის შედეგად დადებული ხელშეკრულების ფარგლებში საკონსულტაციო კომპანია განახორციელებს კონცეპტუალურ დიზაინის და სატენდერო დოკუმენტაციის მომზადებას, უკვე დეტალური დიზაინისა და სამშენებლო სამუშაოებისთვის, რომელიც ვიმედოვნებთ, რომ შემდეგი წლიდან უკვე დაიწყება.

12 მეტროსადგურის [რეაბილიტაცია] არის დაგეგმილი. ამასთან, დარჩენილ სადგურებზე სარეაბილიტაციო სამუშაოების პროექტირების მომზადება იგეგმება. ჩვენ სამუშაოების ხანგრძლივობას ვვარაუდობთ დაახლოებით ხუთი წლის განმავლობაში, იმიტომ, რომ ხვდებით, რომ 12-ვე მეტროსადგურს ერთად ვერ დავიწყებთ, იმიტომ, რომ გარკვეულ ეტაპზე შესაძლებელია სადგურების დაკეტვის საჭიროება გახდეს. აქედან გამომდინარე, პროექტანტმა და შემდეგ მშენებელმა უნდა წარმოგვიდგინოს გეგმა, რომლის მიხედვითაც ეტაპობრივად მოხდება, ამ სადგურების რეაბილიტაცია, რომ მგზავრობა და მგზავრების შეფერხება მაქსიმალურად მინიმუმამდე დავიყვანოთ”, - აღნიშნა მან.