ვინ ფლობს და როდის დაფუძნდა კომპანია, რომელიც „ვარკეთილის“ მეტროს რეაბილიტაციას დაასრულებს
თბილისის მერმა, კახა კალაძემ დედაქალაქის მთავრობის დღევანდელ სხდომაზე განაცხადა, რომ მეტროსადგურ „ვარკეთილის“ სარეაბილიტაციო სამუშაოების მოკლე ვადაში დასასრულებლად ხელშეკრულება ბელარუსულ კომპანია შპს „პრობილდ ექსპერტთან“ (ProBuild Expert) უკვე გაფორმდა.
თუმცა ამ სახელწოდებით (ProBuild Expert) კომპანია მხოლოდ საქართველოში არის რეგისტრირებული, რომელიც 2024 წლის მარტში დაარსდა და მისი ოფისი თბილისში, ბიზნეს ცენტრ “ატრიუმშია” განლაგებული.
სამეწარმეო რეესტრის მიხედვით, კომპანიის სამი მეწილე ჰყავს - 2 ბელარუსის, ერთი კი რუსეთის მოქალაქე. კერძოდ, 33%-ს ფლობს ბელარუსის მოქალაქე ივან საუჩანკა, რომელიც ასევე იკავებს კომპანიის დირექტორის პოსტს, 34%-ს ფლობს ბელარუსის მოქალაქე ევგენი ბობრუკი, 33%-ს კი რუსეთის მოქალაქე ალექსანდერ ნოვიკოვი. აღსანიშნავია, რომ ეს უკანასკნელი საქართველოში კიდევ რამდენიმე კომპანიის მეწილე და დირექტორია.
საქართველოში დარეგისტრირებულ კომპანიას, ბელარუსის მოქალაქეების მმართველობით, სულ 11-50 თანამშრომელი ჰყვას.
რა შეეხება თავად ბალარუსში ბაზირებულ მშობელ კომპანიას, მისი სახელწოდება “StroyTechDiagnost”-ია. კომპანია 2015 წლიდან ბელარუსის მასშტაბით ნებისმიერი სირთულის შენობებსა და ნაგებობებს იკვლევს, ხელახალ დაგეგმვებს არეგისტრირებს და როგორც სარემონტო, ასევე, სამშენებლო კონსტურქციების უსაფრთხო ექსპლუატაციის რეკომენდაციებს შეიმუშავებს.
ქართული ფილიალის ვებგვერდ probuild.expert-ის მიხედვით, კომპანიის ობიექტებია:
- სანატორიუმი აქტალაში, საქართველო
- სანატორიუმი ბორჯომში, საქართველო
- ბაზალეთის რეკრეაციული კომპლექსი, საქართველო
- პლაივუდის ქარხანა მოგილევში, ბელორუსი
- მანქანათმშენებელი ქარხანა გომელში, ბელარუსი
- 100 000 კვ.მ ქარხანა სმორგონში, ბელარუსი
- პლაივუდის ქარხანა მოგილევში, ბელარუსი
- სახელმწიფო უნივერსიტეტი მინსკში, ბელარუსი
- წყლის კოშკების სამშენებლო კონსტრუქციების შემოწმება მინსკში, ბელარუსი
- შენობის კონვერტების შემოწმება თერმული გამოსახულების მეთოდების გამოყენებით გროდნოში, ბელარუსი
- 60-მეტრიანი საკვამურების სამშენებლო კონსტრუქციების შემოწმება, მინსკი, ბელარუსი
მოამზადა ლადო სულაბერიძემ