„ისე ვერ დატოვებდნენ ლილუაშვილს, უმთავრდებოდა ვადა და მისთვის სამინისტრო უნდა შეექმნათ“ - ირაკლი მელაშვილი
„ეს ალბათ, საკადრო თემებიდან გამომდინარეობს, რადგან ლილუაშვილი უშუალოდ არის დაკავშირებული ბიძინა ივანიშვილთან და ეტყობა, თანამდებობის გარეშე არ დატოვეს“, - ასე აფასებს თვითმმართველობის საკითხების სპეციალისტი ირაკლი მელაშვილი რეგიონული განვითარებისა და ინფრასტრუქტურის სამინისტროს გაყოფას.
მისი თქმით, ეს ცალსახად საკადრო ჭრილში უნდა განვიხილოთ, რადგან საერთაშორისო გამოცდილებითაც ამ ორი მიმართულების გაყოფა სრულიად არალოგიკურია.
"სუს-ში ინიშნება ადამიანი, რომელიც პირდაპირ ივანიშვილზე არაა მიბმული"
„იდეაში, ეს ორი რამ ერთად უნდა იყოს. ინფრასტრუქტურული სამუშაოები უნდა განხორციელდეს მას შემდეგ, რაც რეგიონულ და მუნიციპალურ დონეზე დაიგეგმება, თუ რა არის გასაკეთებელი. დამუშავდეს რეგიონების განვითარების გეგმები და შემდეგ გაიწეროს რა ინფრასტრუქტურული სამუშაოებია საჭირო, რომ ეს გეგმა შესრულდეს. რაც მე ვიცი, ევროპის ქვეყნების მაგალითით, ეს ორი ერთად არის.
ჩვენს შემთხვევაში, შეიძლება ჩავთვალოთ, რომ ლილუაშვილს უმთავრდებოდა ვადა და მისთვის სამინისტრო უნდა შეექმნათ, ისე ვერ დატოვებდნენ. გარდა ამისა, სუს-ში კობახიძის კადრი მივიდა, რაც კიდევ უფრო რეპრესიულს გახდის იმ პოლიტიკას, რასაც ეს ორგანო ატარებს. მე ვიქრობ, ეს სწორედ, ამას უკავშირდება, რომ კობახიძემ როგორც პრემიერმა, უფრო მეტი მართვადობა მოიპოვოს სუს-ის მეშვეობით. როგორც მახსოვს,
ეს არის პირველი შემთხვევა, როდესაც სუს-ში ინიშნება ადამიანი, რომელიც პირდაპირ ბიძინა ივანიშვილზე არ არის მიბმული.
სხვა მხრივ, რეგიონული განვითარების და ინფრასტრუქტურის გაყოფის ლოგიკა არ არსებობს იმიტომ, რომ ეს ურთიერთდაკავშირებული ცნებებია.
ეს ალბათ, საკადრო თემებიდან გამომდინარეობს, რადგან ლილუაშვილი უშუალოდ არის დაკავშირებული ბიძინა ივანიშვილთან და ეტყობა, თანამდებობის გარეშე არ დატოვეს.
აქ ასევე მნიშვნელოვანია ფონდების ფუნქციონირება. ერთი არის, რეგიონული განვითარების ფონდი, რომელიც მუნიციპალიტეტებში აფინანსებს პროექტებს და მუნიციპალური ფონდი, რომელიც რეგიონებში აფინანსებს (აქაც გადატრიალება გვაქვს). ეს ფონდები სად დარჩება? თუ ინფრასტრუქტურის სამინისტრო რჩება, წესით, მისი საქმის გასაკეთებლად ეს ფონდები უნდა დარჩეს აქ, მაგრამ რეგიონული განვითარება როგორ უნდა დაგეგმო ამ ფონდების გარეშე? მეორე მხრივ, თუ რეგიონებში წამოიღე ეს ფონდები, მაშინ ინფრასტრუქტურის სამინისტროში რა რჩება? მხოლოდ ავტობანები და მსხვილი სახელმწიფო მნიშვნელობის პროექტები? ეს ყველაფერი გაურკვეველია და გამოიწვევს სირთულეებს, სტრუქტურული მართვის თვალსაზრისით“, - ამბობს ირაკლი მელაშვილი.
შეგახსენებთ, რომ რეგიონული განვითარებისა და ინფრასტრუქტურის სამინისტრო გაიყოფა და ორ ცალკე უწყებად ჩამოყალიბდება. როგორც ირაკლი კობახიძემ ბრიფინგზე განაცხადა, შესაბამისი კანონპროექტი უკვე გადაეგზავნა პარლამენტს, რომელსაც საკანონმდებლო ორგანო 15-18 აპრილს განიხილავს.
მისივე ცნობით, რეგიონული განვითარების მინისტრის პოზიციას დაიკავებს გრიგოლ ლილუაშვილი, რომელმაც უკვე დატოვა სახელმწიფო უსაფრთხოების სამსახურის უფროსის თანამდებობა.
ამასთან, როგორც კობახიძემ განაცხადა, ინფრასტრუქტურის მინისტრის პოზიციაზე საქმიანობას კვლავ ირაკლი ქარსელაძე გააგრძელებს. რაც შეეხება სუს-ის ხელმძღვანელის ვაკანტურ ადგილს, იუსტიციის მინისტრი ანრი ოხანაშვილი დაიკავებს, ხოლო იუსტიციის მინისტრი პაატა სალია გახდება.
