რა ქონებას ფლობენ ბრიტანეთის მიერ სანქცირებული ლევან მურუსიძე და მიხეილ ჩინჩალაძე
დიდმა ბრიტანეთმა ქართველ მოსამართლეებს - ლევან მურუსიძესა და მიხეილ ჩინჩალაძეს სანქციები დაუწესა. ბრიტანეთის მთავრობის განცხადებით, არსებობს საფუძვლიანი ეჭვი, ჩინჩალაძისა და მურუსიძის კორუფციაში ჩართულობის შესახებ.
ცნობისთვის, დიდი ბრიტანეთის გლობალური ანტიკორუფციული სანქციების აქტი ფინანსური და ეკონომიკური რესურსების გაყინვას ითვალისწინებს.
„ბიზნესპრესნიუსი“ დაინტერესდა, რა ქონებას ფლობენ აღნიშნული მოსამართლეები. შეგახსენებთ, თანამდებობის პირების ქონებრივი დეკლარაციები ანტიკორუფციული ბიუროს ვებგვერდზე უნდა იყოს საჯაროდ ხელმისაწვდომი, თუმცა, რამდენიმე თვეა დეკლარაციები საიტზე ხელმისაწვდომი არ არის. ამის მიზეზად კი ვებგვერდის ტექნიკური სამუშაოები სახელდება.
თუმცა, სანამ ეს დეკლარაციები ჯერ კიდევ საჯაროდ იყო ხელმისაწვდომი, არასამთავრობო ორგანიზაციამ IDFI-მ მოამზადა თანამდებობის პირების ქონებრივი დეკლარაციების ბაზა, სადაც თავმოყრილია 2017-2024 წლების (პორტალზე წვდომის სრულად შეზღუდვამდე) თანამდებობის პირთა მიერ შევსებულ დეკლარაციები.
ამ მონაცემებზე დაყრდნობით გთავაზობთ, რა მოძრავ და უძრავ ქონებას ფლობენ, ასევე როგორია ბრიტანეთის მიერ სანქცირებული მოსამართლეების ფინანსური მდგომარეობა:
რა ქონება ფლობს ლევან მურუსიძე
2024 წლის 28 ივნისს შევსებული დეკლარაციის მიხედვით, თბილისის სააპელაციო სასამართლო მოსამართლე ლევან მურუსიძემ 2009 წელს 40 000 დოლარად თბილისში ბინა, 2015 წელს კი 5 000 დოლარად შეიძინა ავტოფარეხი. გარდა ამისა, მურუსიძის ანგარიშზეა 10 500 დოლარად მცხეთაში, სოფელ ძეგვში 2019 წელს შეძენილი მიწის ნაკვეთი.
რაც შეეხება ფინანსურ ნაწილში, სახელფასო ანგარიშზე დეკლარაციის შევსების მომენტში უფიქსირდებოდა 3 580 ლარზე მეტი.
მანვე 2023 წელს საქართველოს იუსტიციის უმაღლესი საბჭოს წევრობისთვის ხელფასის სახით აიღო 11 577 ლარი, ხოლო იუსტიციის უმაღლეს საბჭოსთან არსებულ სსიპ საერთო სასამართლოების დეპარტამენტში მუშაობისთვის 94 422 ლარი.
რა ქონება ფლობს მიხეილ ჩინჩალაძე
2024 წლის ივნისში შევსებული დეკლარაციის მიხედვით, მიხეილ ჩინჩალაძემ 2023 წელს იუსტიციის უმაღლეს საბჭოსთან არსებული საერთო სასამართლოს დეპარტამენტში დაკავებული პოზიციისთვის ხელფასის სახით 107 173 ლარი მიიღო.
ამასთანავე, 2009-2024 წლებში ჩინჩალაძეს აღებული ჰქონდა 100 000 დოლარის ოდენობით სესხი. დოკუმენტების მიხედვით, დეკლარაციის შევსების მომენტში სხვადასხვა ბანკის ანგარიშზე მას უფიქსირდებოდა 5081 ლარი და 30 დოლარი.
დეკლარაციის მიხედვით, ჩინჩალაძეს ავტომობილი არ ჰყავს. უძრავი ქონების სახით კი აქვს თბილისში ნაჩუქარი ბინა.
რაც შეეხება მის მეუღლეს, მარიკა მარიკაშვილს, მან ხელფასის სახით 2023 წელს შპს „მეამას“ კონსულტანტად მუშაობისთვის 36 318 ლარი მიიღო. ამასთანავე, მას დედამ უცხოეთიდან 28 000 დოლარი გადმოურიცხა. ჩუქების სახით კი მითითებული აქვს დედისგან უცხოეთიდან გადმოგზავნილი 12 000 დოლარი. მარიკაშვილს ანგარიშზე 674 ლარი და 30 ევრო უფიქსირდება.
