ძალიან დიდი მატებაა, გრამი ოქრო 33 ლარით გაგვიძვირდა, თუმცა რესურსების ხარჯზე ჯერ-ჯერობით ფასის შენარჩუნებას ვახერხებთ - "ზარაფხანა"

„იმის მიუხედავად, რომ ოქრო ქართულ ბაზარზეც ძვირდება, რესურსების ხარჯზე ვახერხებთ, რომ ეს ჩვენს ნაკეთობებზე არსებულ ფასებზე ეს არ აისახოს - შემიძლია ვთქვა, რომ ჯერ-ჯერობით ამ პროცესს წარმატებით ვმართავთ“, - ამის შესახებ „ბიზნესპრესნიუსს“ კომპანია „ზარაფხანას“ გენერალურმა დირექტორმა, თორნიკე სამხარაძემ განუცხადა.

Gold Price-ის მონაცემებით, ბოლო კვირებში ოქროს ფასის ისტორიული პიკი რამდენჯერმე დაფიქსირდა, ბოლო ასეთი რეკორდი დღეს (2 აპრილი) თბილისის დროით 09:00 საათზე იყო, როცა უნცია ოქროს ფასმა 3 149 აშშ დოლარი შეადგინა.

როდიდან პროგნოზირებენ ოქროს კიდევ გაძვირებას - "ძალიან დიდი მატებაა"

„დეკემბრის ბოლოს, 995 და 999 სინჯის ოქროს, გრამს დაახლოებით 245 ლარად ვყიდულობდით, დღესდღეობით კი ეს ფასი 278 ლარამდეა გაზრდილი. 33 ლარი ძალიან დიდი მატებაა და ასეთი სხვაობა ხშირად წელიწადში ან წელიწად-ნახევარშიც არ არის ხოლმე.

რაც შეეხება უახლოეს მოლოდინებს, საერთაშორისო ბაზარზე თუკი ფასის მატების ტენდენცია გაგრძელდა, ჩვენი მყარი რესურსები გვაძლევს საშუალებას, რომ ფასს კიდევ მინიმუმ ერთი კვარტლის განმავლობაში არ მოვუმატოთ. თუმცა, თუ უნციის ფასი 3 200 აშშ დოლარს გადასცდება, ჩვენს მოგვიწევს, ფასების მატებისთვის მომზადება დავიწყოთ“, - აღნიშნა თორნიკე სამხარაძემ.

2 აპრილს, თბილისის დროით 18:00 საათისთვის, Gold Price-ის თანახმად, უნცია ოქროს ფასმა 3 122 აშშ დოლარი შეადგინა, რაც თვის ჭრილში 6.99%-იანი ზრდაა, წლის ჭრილში კი - 35.49%-იანი.