„ყვარლის ბაგას“ რძის ხარისხი აღემატება ბევრი დასავლური ქვეყნის მწარმოებლის რძის ხარისხს" - ფერმის განცხადება

„ყვარლის ბაგას“ რძის ხარისხი აღემატება ბევრი დასავლური ქვეყნის მწარმოებლის რძის ხარისხს," - ამის შესახებ შპს "ყვარლის ბაგას" მიერ გავრცელებლ განცხადებაშია აღნიშნული, რომლითაც ფერმა ეხმაურება მათ შესახებ გავრცელებულ ინფორმაციას, რომ რძის მწარმოებელი კომპანია „ყვარლის ბაგა“, რომელსაც ათასობით ძროხა ჰყავს, საქონლის გამოსაკვებად ქათმის სკინტლს იყენებდა. „ყვარლის ბაგის“ რძეს კი ყიდულობენ „სანტე“, „სოფლის ნობათი“, „აგროჰაბი“ და „ყვარლის ბაგის“ შვილობილი „რძის ლაბორატორია“.

უფრო კონკრეტულად, აღნიშნულთან დაკავშირებით სპეციალური გამოძიება მოამზადა "რადიო თავისუფლებამ". მათ მიერ გავრცელებული ინფორმაცია შეეხება, საქართველოში რამდენიმე წლის განმავლობაში მიმდინარე ბიზნესდავას. კერძოდ, "რადიო თავისუფლების" ინფორმაციით, 2018 წლის ზაფხულში საქართველოში ნედლი რძის მწარმოებელი უდიდესი ფერმის „ყვარლის ბაგა“ მფლობელი, ქათმის ხორცის ყველაზე მსხვილ მწარმოებელ კომპანია “ჩირინას” შეუთანხმდა, რის საფუძველზეც “ყვარლის ბაგას” “ჩირინასგან” ქათმის ნაკელი უნდა ეყიდა. “ყვარლის ბაგამ” ერთი წლის განმავლობაში “ჩირინასგან” დაახლოებით 2700 ტონა ქათმის ნედლი, გადაუმუშავებელი ნაკელი შეიძინა.

ამ გარიგებიდან ერთი წლის თავზე, “ყვარლის ბაგა” პარტნიორ კომპანიას უყენებს პრეტენზიას, რომ მათთან ნაყიდმა ქათმის ნაკელმა, რომელსაც ძროხებს აჭმევდნენ, საქონელი დახოცა, რის გამოც 1.65 მილიონი ლარის ზარალი მიადგა. “ჩირინამ” პრეტენზიები არ მიიღო, რადგან მათი განმარტებით, ქათმის ნაკელს ის სასუქად ყიდდა და არა საკვებად. 2020 წელს კი ლაშა პაპაშვილის “ყვარლის ბაგამ” "ჩირინას" სასამართლოში უჩივლა. სასამართლო დავას კომპანიებს შორის, სამი წელი უშედეგოდ განიხილავდა რუსთავის სასამართლო, 2024 წელს კი თბილისის საქალაქო სასამართლომ ეს დავა დაჩქარებულად განიხილა და დეკემბერში პაპაშვილის ყველა მოთხოვნა დააკმაყოფილა.

"რადიო თავისუფლების" მიერ ამ ინფორმაციის გავრცელებამ დიდი აჟიოტაჟი გამოიწვია, რადგან როგორც მათ მიერ მომზადებულ გამოძიებაში იყო აღნიშნული, "ყვარლის ბაგას" მიერ ნედლი რძე მიეწოდებოდა ისეთ კომპანიებს, როგორიცაა: "სანტე", "სოფლის ნობათი", ასევე ჰიპერმარკეტების ქსელი "აგროჰაბი", რომელთაც საკმაოდ ბევრი მომხმარებელი ყავს.

ამ გამოძიებას, განცხადებით მალევე უპასუხეს "სანტემ" და "აგროჰაბმა". უფრო კონკრეტულად, როგორც "აგროჰაბში" განაცხადეს, ნებისმიერი ნედლეული თუ პროდუქტი, რომელსაც კომპანია იღებს სხვა მომწოდებლისგან გადის რამდენიმესაფეხურიან დამატებით შემოწმებას მათსავე ლაბორატორიაში. მათივე განმარტებით, "სრულიად გამორიცხულია ნედლეულმა გადმოკვეთოს აგროჰაბის წარმოების „საზღვარი“ და შემდეგ პროდუქტის სახით გავიდეს საწარმოდან, რომელიც რაიმე სახით არ აკმაყოფილებს ხარისხის მოთხოვნებს".

რაც შეეხება "სანტეს", კომპანიის განცხადებით, "ნებისმიერი ნედლეული - რძე, რომელსაც ,,სანტე“ იღებს, შემოწმებულია ხარისხის უმაღლესი ევროპული სტანდარტით. თუ რძე ატარებს რაიმე ტიპის პოტენციურ რისკს ხარისხთან დაკავშირებით, არ მიიღება და არ ვიყენებთ წარმოებაში". მათივე ცნობით, "სანტე" იყო პირველი, რომელმაც 2018 წელს რამდენჯერმე აღმოაჩინა ხარისხობრივი შეუსაბამობა ,,ყვარლის ბაგის“ მიერ მოწოდებულ რძეში და არ შეისყიდა მისგან რძე.

"ყვარლის ბაგა" ძროხების ნაკელით გამოკვებაზე განცხადებას ავრცელებს

ცოტა ხნის წინ კი, სპეციალური განცხადება გაავრცელა შპს "ყვარლის ბაგამაც", სადაც აღნიშნულია, რომ 2019 წლიდან „ყვარლის ბაგას“ კვების რაციონში ქათმის ნარჩენები აღარ გამოყენებულა. მეტიც, მათივე განმარტებით, „ყვარლის ბაგას“ რძის ხარისხი აღემატება ბევრი დასავლური ქვეყნის მწარმოებლის რძის ხარისხს. ამასთან, ფერმაში აცხადებენ, რომ ყველა, ზემოთ ჩამოთვლილ კომპანიასთან დღემდე გრძელდება თანამშრომლობა.

"ბიზნესპრესნიუსი" შპს "ყვარლის ბაგის" მიერ გავრცელებულ განცხადებას უცვლელად გთავაზობთ:

"მომხმარებელთა მაღალი ინტერესიდან გამომდინარე, გვსურს მოგაწოდოთ ამომწურავი ინფორმაცია. შპს „ყვარლის ბაგა“ 2014 წლიდან ყოველდღიურად აწვდის ნედლ რძეს „სანტეს“ (რძის პროდუქტების გადამამუშავებელი მსოფლიო გიგანტის, „ლაქტალისის“, შვილობილი კომპანია). მოგვიანებით, მყიდველთა სიას დაემატნენ „სოფლის ნობათი“ ,(კვების ინდუსტრიაში მომუშავე ამერიკული უმსხვილესი კომპანიის, „პეპსიკოს“ შვილობილი), „აგროჰაბი“ (ყველასთვის კარგად ნაცნობი ადგილობრივი ბრენდი) და „რძის ლაბორატორია“ (არანაკლებ პოპულარული ადგილობრივი ბრენდი).

ყველა, ზემოთ ჩამოთვლილ კომპანიასთან დღემდე გრძელდება თანამშრომლობა და თითოეული დაადასტურებს (ლაბორატორიულადაც) შპს „ყვარლის ბაგას“ მიერ მოწოდებული ნედლი რძის უმაღლეს ხარისხს.

უფრო მეტიც, ჩვენ ვამაყობთ და მრავალი უცხოელი ექსპერტიც აღნიშნავს, რომ შპს „ყვარლის ბაგას“ რძის ხარისხი აღემატება ბევრი დასავლური ქვეყნის მწარმოებლის რძის ხარისხს. 2015-2020 წლებში შპს „ყვარლის ბაგას“ მართავდა ისრაელიდან მოწვეული ვეტერინარიის პროფესორი, რომლის გადაწყვეტილებით, ისრაელში არსებული პრაქტიკის გათვალისწინებით 2018 -2019 ფერმის კვების რაციონს დაემატა გადამუშავებული ქათმის ნარჩენი. აღსანიშნავია, რომ ეს იყო საკვებ-დანამატი (მაღალი ხარისხის პროტეინის წყარო) და არა ძირითადი ინგრედიენტი.

ქათმის ნარჩენების ძროხის საკვებ დანამატად გამოყენების დასაშვებობას ადასტურებს ცხოველთა კვების რესურსების ონლაინ მონაცემთა ბაზაც. ანტიბიოტიკების კვალის აღმოჩენისთანავე, დავიწყეთ მოკვლევა და დამოუკიდებელი ლაბორატორიების (როგორც ადგილობრივი, ისე საერთაშორისო) მიერ მოწოდებული დასკვნის მიღებისთანავე, რომლითაც დადასტურდა შპს „ჩირინას“ პროდუქციაში ანტიბიოტიკის არსებობა, 2019 წელს შპს „ჩირინასთან“ თანამშრომლობა შეწყდა და შპს „ყვარლის ბაგას“ კვების რაციონში ქათმის ნარჩენები აღარ გამოყენებულა.

ხაზგასმით ვაცხადებთ, რომ წუნდებული რძე არ ჩაშვებულა არც შპს "ყვარლის ბაგას" და არც სხვა რომელიმე შემსყიდველის წარმოებაში, იგი განადგურებულ იქნა და სწორედ რძის დანაკარგით და მეურნეობისათვის მიყენებული ზიანის ანაზღაურებას ითხოვს შპს "ყვარლის ბაგა" შპს "ჩირინასგან“. „ყვარლის ბაგა“ ღიაა კომუნიკაციისთვის და მზად არის ნებისმიერ დაინტერესებულ მხარეს მიაწოდოს დამატებითი ინფორმაცია," - აღნიშნულია შპს "ყვარლის ბაგას" მიერ გავრცელებულ განცხადებაში.