„მოლაპარაკებები გვაქვს აშშ-ს სხვადასხვა შტატთან წვენების ექსპორტზე, როგორ იმოქმედებს პროცესები ჯერ არ ვიცით“
„კარგი რომ არ იქნება, ცხადია“, - ასე ეხმაურება „ბიზნესპრესნიუსთან“ საუბრისას ნატურალური წვენების მწარმოებელი კომპანია „ალალის“ დამფუძნებელი გოჩა ღვინეფაძე ამერიკის მიერ საქართველოსთვის დაწესებულ 10%-იან ტარიფებს.
კითხვაზე, გაზრდილი ტარიფები გამოიწვევს თუ არა იმას, რომ ქართველი მეწარმეებისთვის აღნიშნული ბაზარი შესაძლოა, ნაკლებად მიმზიდველი გახდეს, ღვინეფაძე პასუხობს რომ საკითხი გლობალურ ჭრილშია განსახილველი.
როგორც ცნობილია, ტრამპის მიერ დაწესებული ტარიფები მრავალ ქვეყანას მოიცავს, შესაბამისად, ღვინეფაძე აცხადებს, რომ ჯერ უნდა დააკვირდნენ ბაზარზე უახლოეს პერიოდში შექმნილ ვითარებასა და კონკურენციის ცვლილებას.
„კარგი რომ არ იქნება დაწესებული ტარიფები ცხადია. ზოგადად, გაზრდილი ფასები და ბარიერები არასდროს მოქმედებს დადებითად. მასშტაბურად უნდა შევხედოთ საკითხს, სხვა ქვეყნებისთვის დაწესებული ტარიფები როგორი იქნება და რა გავლენას იქონიებს კონკურენტებზე, ასევე თურქეთს რა ოდენობის ტარიფი დაუწესდა, ევროკავშირს რამდენი და ა.შ. ეს მარტო ერთეული საქართველოს შემთხვევა არ არის. უარყოფითად იმოქმედებდა მხოლოდ საქართველოსთვის, რომ დაეწესებინა. როდესაც უკვე გლობალურად აწესებს აშშ ტარიფებს, ეს ცალკე სამსჯელო საკითხი იქნება. ერთ კვირაში, ალბათ, უფრო კონკრეტულად ჩამოყალიბდება პოზიციები.
ჯერ-ჯერობით წელიწადში 2-3 კონტეინერი გაგვაქვს ამერიკაში. ამასთან, კანადაში გადის ჩვენი კომპანიიდან 2 კონტეინერი. მოლაპარაკებები გვაქვს ამერიკის სხვა შტატებთან ექსპორტზე, ამ კუთხით როგორ იმოქმედებს პროცესები, ჯერ არ ვიცით. უნდა დავაკვირდეთ განვითარებულ მოვლენებს,“ - განაცხადა ღვინეფაძემ.
„ბიზნესპრესნიუსი“ უკვე წერდა იმ პროდუქტების შესახებ, რომელიც ამერიკაში ყველაზე მეტი ღირებულების გადის. ამ სიის ხუთეულში არის ხილის და ბოსტნეულის წვენებიც. მაგალითად, მხოლოდ 2025 წლის იანვარ-თებერვალში ამერიკაში ექსპორტზე გავიდა 709 ათასი დოლარის ღირებულების 530 ტონა წვენი.
შეგახსენებთ, რომ აშშ-ის პრეზიდენტმა დონალდ ტრამპმა ამერიკაში იმპორტირებულ თითქმის ყველა საქონელზე მინიმუმ 10%-იანი ტარიფების დაწესების შესახებ განაცხადა. ქვეყნებისა და პროდუქციის ტიპის მიხედვით ტარიფები 46%-საც კი აღწევს.
აღსანიშნავია ისიც, რომ ტრამპის მიერ გამოცხადებული ტარიფების ფარგლებში საქართველოს, სომხეთისა და აზერბაიჯანის მიმართ საბაზისო 10%-იანი ტარიფი იმოქმედებს. რაც შეეხება ვადებს, საბაზისო 10%-იანი ტარიფები 5 აპრილს შევა ძალაში. აღსანიშნავია ისიც, რომ ტრამპის გადაწყვეტილებას უკვე ეხმაურებიან მსოფლიო ლიდერები და ამერიკის წინააღმდეგ საპასუხო ტარიფების დაწესებას აანონსებენ.
