„აშშ-ის ბაზარს ტარიფების გამო არ დავკარგავთ“ - ფეროშენადნობთა ასოციაცია
ფეროშენადნობთა ასოციაციის თავმჯდომარის ნუგზარ კევლიშვილის განცხადებით, აშშ-ის მიერ დაწესებული ტარიფები სილიკომანგანუმს შესაძლოა, არ შეეხოს.
მანვე „ბიზნესპრესნიუსთან“ საუბრისას განიხილა მეორე სცენარიც და აღნიშნა, რომ იმ შემთხვევაში, თუ ტარიფები ფეროებზეც გავრცელდა, ქართველი მეწარმეები ამერიკულ ბაზარზე მაინც კონკურენტუნარიანები იქნებიან, იქიდან გამომდინარე, რომ საქართველოსთვის დაწესებული ტარიფი, სხვა ქვეყნებთან შედარებით, გაცილებით დაბალი - 10%-ია.
„დილიდან გავეცანით მიღებულ ახალ პაკეტს და საქმე იმაშია, რომ ბუნდოვანია და 100%-ით ვერ ვიტყვით, რომ ეს ეხება ქართულ ფეროშენადნობებს, იქიდან გამომდინარე, რომ გამონაკლისებში არის საუბარი ფეროშენადნობებზე, შესაძლებელია, რომ ეს 10% ფეროშენადნობებს არ შეეხოს ჩვენს სექტორს, მაგრამ ზუსტად ვერ ვამბობთ.
თუმცა, დავუშვათ და შეგვეხო, მე ვერ ვიტყვი იმას, რომ ძალიან უარყოფითად იმოქმედებს ეს ფეროშენადნობებზე. იმის გამო, რომ მაინც პრივილეგირებულ სიტუაციაში ვიქნებით, ვიდრე სხვა ქვეყნები, იქიდან გამომდინარე, რომ ჩვენ თუ დაწესებული გვაქვს 10%, ასევე აქვს 10% ავსტრალიასა და ბრაზილიას, სხვა ქვეყნებს გაცილებით ბევრი - 20-25% აქვთ. ხაზი მინდა გავუსვა იმას, რომ ამერიკის შეერთებული შტატები იმ ოდენობის ფეროშენადნობებს არ აწარმოებს, რაც მათ სჭირდებათ, შესაბამისად, იმპორტი გარდაუვალია აშშ-სთვის - აღნიშნულის გამო უკეთეს სიტუაციაში ვიქნებით.
ფასი ამერიკის შეერთებულ შტატებში გაიზრდება. თუ ეს ტარიფი იქნება, 10%-ით გაუძვირდებათ ჩვენი პროდუქცია იქაურ მეწარმეებს, რომლებიც შეისყიდიან ამ პროდუქტს, ჩვენთვის პრემიალური გახდება - მეტ ფასად გავყიდით, მაგრამ ყველაფერი მოლაპარაკებაზეა მაინც დამოკიდებული. შეიძლება ორივე მხარემ მოილაპარაკოს, რომ ეს 10% გაიყონ შუაზე [5 გამყიდველმა და 5 მყიდველმა], თუმცა, ქართველი მეწარმეებისთვის ეს კატასტროფა არ იქნება და აშშ-ის ბაზარს ჩვენ ამ ტარიფების გამო არ დავკარგავთ“, - განაცხადა ნუგზარ კევლიშვილმა „ბიზნესპრესნიუსთან“.
ცნობისთვის, 2025 წლის იანვარ-თებერვალში ამერიკაში ქართული წარმოების ფეროშენადნობების ექსპორტი არ განხორციელებულა. 2024 წელს კი აშშ-ში ექსპორტზე გავიდა 90 119 530 დოლარის ღირებულების 72 953 ტონა საქონელი.
აშშ-ის პრეზიდენტმა დონალდ ტრამპმა ამერიკაში იმპორტირებულ თითქმის ყველა საქონელზე მინიმუმ 10%-იანი ტარიფების დაწესების შესახებ განაცხადა. ქვეყნებისა და პროდუქციის ტიპის მიხედვით ტარიფები 46%-საც კი აღწევს.
აღსანიშნავია ისიც, რომ ტრამპის მიერ გამოცხადებული ტარიფების ფარგლებში საქართველოს, სომხეთისა და აზერბაიჯანის მიმართ საბაზისო 10%-იანი ტარიფი იმოქმედებს. რაც შეეხება ვადებს, საბაზისო 10%-იანი ტარიფები 5 აპრილს შევა ძალაში. აღსანიშნავია ისიც, რომ ტრამპის გადაწყვეტილებას უკვე ეხმაურებიან მსოფლიო ლიდერები და ამერიკის წინააღმდეგ საპასუხო ტარიფების დაწესებას აანონსებენ.
