ვის ეკუთვნის „სანტე“ და „სოფლის ნობათი“, რომელთა გარშემო სკანდალები გრძელდება
ბოლოდ დღეების განმავლობაში რძის პროდუქტების ბაზარზე სკანდალები არ წყდება. რამდენიმე დღის წინ ცნობილი გახდა, რომ „ყვარლის ბაგა“ , რომელიც საქონლის გამოსაკვებად ქათმის სკინტლს იყენებდა, ისეთ კომპანიებს ამარაგებდა რძით, როგორებიცაა „სანტე“, „სოფლის ნობათი“, „აგროჰაბი“ და „ყვარლის ბაგის“ შვილობილი „რძის ლაბორატორია“.
დღეს კი, ცნობილი გახდა, რომ „სოფლის ნობათის“ შემოწმებისას კრიტიკული შეუსაბამობა გამოვლინდა. კერძოდ, სურსათის ეროვნული სააგენტოს ინფორმაციით, კომპანიის მიერ წარმოებული ზოგიერთი პროდუქტის რძის ნიმუშებში აფლატოქსინ M1-ზე გამოვლინდა, რაც ადამიანის ჯანმრთელობას საფრთხეს უქმნის.
„ბიზნესპრესნიუსი" დაინტერესდა, ვის ეკუთვნის „სანტე" და „სოფლის ნობათი“.
სამეწარმეო რეესტრის მიხედვით, „სოფლის ნობათის“ პროდუქციის მწარმოებელი კომპანია "ვიმ-ბილ-დან საქართველოა". „სოფლის ნობათი“ საქართველოს ბაზარზე ოფიციალურად 2008 წლიდან ოპერირებს. მონაცემების მიხედვით, კომპანიის 100%-ანი წილის მფლობელი რუსეთში რეგისტრირებული სააქციო საზოგადოება „ვიმ-ბილდან“ არის. კომპანიის დირექტორია ნუნუ ფორჩხიძე.
რაც შეეხება „სანტე ჯი ემ თის“, კომპანია ბაზარზე 1998 წლიდან ფუნქციონირებს. მისი 100%-იანი წილის მფლობელი ბელგიაში რეგისტრირებული „ ბი.ეს.ეი. ინთერნეიშენალ“ არის, ხოლო დირექტორი ერეკლე გამყრელიძე.
აქვე უნდა აღნიშნოს, რომ სკანდალთან დაკავშირებით „სანტე“-მ განცხადება მალევე გაავრცელა. კომპანიის განმარტებით, "ნებისმიერი ნედლეული - რძე, რომელსაც ,,სანტე“ იღებს, შემოწმებულია ხარისხის უმაღლესი ევროპული სტანდარტით. თუ რძე ატარებს რაიმე ტიპის პოტენციურ რისკს ხარისხთან დაკავშირებით, არ მიიღება და არ ვიყენებთ წარმოებაში". მათივე ცნობით, "სანტე" იყო პირველი, რომელმაც 2018 წელს რამდენჯერმე აღმოაჩინა ხარისხობრივი შეუსაბამობა ,,ყვარლის ბაგის“ მიერ მოწოდებულ რძეში და არ შეისყიდა მისგან რძე.
