თბილისში მგზავრთა 60 ახალი მოსაცდელი დამონტაჟდება - როგორი იქნება (+ფოტო)

თბილისში მასშტაბით ავტობუსების გაჩერებებზე მგზავრთა 60 ახალი მოსაცდელი დამონტაჟდება, აქედან 40 ერთეული 3-მეტრიანი, დანარჩენი 20 კი 4.5-მეტრიანი იქნება. ბაზრის კვლევაზე შესაბამისი განაცხადი სახელმწიფო შესყიდვების სააგენტოს ვებგვერდზე უკვე გამოქვეყნდა. ფასების გამოკვლევით უნდა დადგინდეს, თუ რა დაუჯდება აღნიშნული პროექტი თბილისის ტრანსპორტისა და ურბანული განვითარების სააგენტოს.

დოკუმენტაციის მიხედვით, მომსახურების გაწევის ვადა განისაზღვრება ხელშეკრულების გაფორმებიდან არაუგვიანეს 2025 წლის 31 დეკემბრამდე, ეტაპობრივად, შემსყიდველის წერილობითი დავალების შესაბამისად. ამასთან, შესრულებული სამუშაოს ხარისხის საგარანტიო ვადაა საბოლოო მიღება-ჩაბარების აქტის გაფორმებიდან 3 (სამი) წელი.

სააგენტოს დოკუმენტაციის მიხედვით, პრეტენდენტს 2021 წლის 1-ლი იანვრიდან მოცემულ ტენდერში წინადადებების მიღების დასრულების დღემდე უნდა ჰქონდეს არანაკლებ 525 000 ლარის ოდენობის ლითონ-კონსტრუქციების სამუშაოების გამოცდილება.