რა ქონებით ტოვებს თორნიკე რიჟვაძე აჭარის ავტონომიური რესპუბლიკის მთავრობის თავმჯდომარის პოსტს
აჭარის ავტონომიური რესპუბლიკის მთავრობის თავმჯდომარე თორნიკე რიჟვაძე თანამდებობას ტოვებს. მან ამის შესახებ სოციალურ ქსელში დაწერა.
რიჟვაძემ მადლობა გადაუხადა „ქართული ოცნების“ წარმომადგენლებს, ბიძინა ივანიშვილს, ასევე აჭარის მოსახლეობას მისთვის გამოცხადებული ნდობისთვის და განმარტა, რომ „დროა სიახლის“.
„ბიზნესპრესნიუსი“ დაინტერესდა რა ქონებას ფლობს თორნიკე რიჟვაძე.
როგორც ცნობილია, თანამდებობის პირების ქონებრივი დეკლარაციები ანტიკორუფციული ბიუროს ვებ-გვერდზე უნდა იყოს საჯაროდ განთავსებული, თუმცა, რამდენიმე თვეა დეკლარაციები საიტზე ხელმისაწვდომი არ არის. ამის მიზეზად კი ვებ-გვერდის ტექნიკური სამუშაოები სახელდება.
თუმცა, სანამ ეს დეკლარაციები ჯერ კიდევ საჯაროდ იყო ხელმისაწვდომი, არასამთავრობო ორგანიზაციამ IDFI-მ მოამზადა თანამდებობის პირების ქონებრივი დეკლარაციების ბაზა, სადაც თავმოყრილია 2017-2024 წლების (პორტალზე წვდომის სრულად შეზღუდვამდე) თანამდებობის პირთა მიერ შევსებულ დეკლარაციები.
შესაბამისად, ამ ბაზაში ჩანს, რომ თორნიკე რიჟვაძემ ქონებრივი დეკლარაცია გასული წლის სექტემბერში შეავსო.
დოკუმენტის მიხედვით, რიჟვაძის საკუთრებაშია ბინა თბილისში, რომელშიც 2017 წელს 61 000 აშშ დოლარი გადაიხადა; ასევე, კომერციული ფართი ბათუმში, რომლის ღირებულება 2014 წელს 65 000 აშშ დოლარი იყო.
გარდა ამისა, მისი მეუღლის სახელზეა 2 მიწის ნაკვეთი ხულოში და ბინა ბათუმში, რომელიც მას მემკვიდრეობითა და ჩუქებით გადაეცა.
ამასთან, მის მეუღლეს ეკუთვნის მსუბუქი ავტომობილი Toyota Camry-ი, რომელიც 8500 აშშ დოლარად აქვს შეძენილი.
რაც შეეხება ფინანსურ მდგომარეობას, თორნიკე რიჟვაძეს დეკლარაციის შევსების მომენტში საბანკო ანგარიშებზე ჰქონდა 44 172 ლარი.
დეკლარაციის მიხედვითვე თორნიკე რიჟვაძე არის შპს „აჭარა ბერრის ლიმითედ“-ის 25%-ანი წილის მფლობელი, თუმცა მითითებულია, რომ კომპანია ამჟამად არ ფუნქციონირებს.
ამასთან, როგორც დოკუმენტშია აღნიშნული, თორნიკე რიჟვაძეს აჭარის ავტონომიური რესპუბლიკის მთავრობის თავმჯდომარის პოსტზე, 2023 წელს ხელფასის სახით მიღებული აქვს 55 035 ლარი.
გარდა ამისა, კომერციული ფართის იჯარიდან მიღებულმა შემოსავალმა 2023 წელს შეადგინა 22 278 ლარი.
