ანალოგი არ გააჩნია - ყაზახეთში იშვიათი ლითონის უმსხვილესი საბადო აღმოაჩინეს
ყაზახეთის ყარაგანდას რეგიონში, კუირექტიკოლის მონაკვეთზე იშვიათი ლითონის უმსხვილესი საბადო აღმოაჩინეს.
ამის შესახებ ადგილობრივი კომპანია Tsentrgeolsemka-ს გეოლოგების განცხადებაში წერია, რასაც ყაზახური მედია ავრცელებს.
ამასთან, ყაზახეთის მრეწველობის სამინისტროს ცნობით, რესურსის მთლიანი მოცულობა შეფასებულია ათეულობით მილიონი ტონით, რისი კონცენტრაციაც სამომავლოდ სამრეწველო განვითარების დაწყების საშუალებას იძლევა.
ახალი კლასტერის ტერიტორიაზე, სახელწოდებით, “Жаңа Қазақстан,” გეოლოგები 300 მეტრამდე სიღრმეზე 20 მლნ ტონამდე იშვიათ რესურსს პროგნოზირებენ. ექსპერტები ახალი სამრეწველო ტიპის საბადოზე საუბრობენ, რომელსაც ყაზახეთში ანალოგი არ აქვს.
2022-იდან 2024 წლამდე ყაზახეთში ორი განსაკუთრებით პერსპექტიული ზონა, ირგიზი და დოს-2 აღმოაჩინეს. ცალკეულ უბნებზე იშვიათი ელემენტების კონცენტრაცია 0,25%-ს აღწევს, რაც მაღალ მაჩვენებლად ითვლება. ჯერჯერობით ყველაზე დიდი ბლოკი ირგიზის ტერიტორიაა, სადაც, წინასწარი გათვლებით, 800 ათას ტონამდე იშვიათი ლითონის მარაგია 935,4 ათასი ტონა პროგნოზირებული რესურსით.
თუმცა ამ პოტენციალის სრულად რეალიზებას წლები და მნიშვნელოვანი ინვესტიცია სჭირდება, რადგან ყაზახეთს იშვიათი ლითონის ღრმა დამუშავების ტექნოლოგია არ გააჩნია. ამ თვალსაზრისით ქვეყანა უცხოელ პარტნიორებზე რჩება დამოკიდებული. მთავრობა აშშ-ის, ევროკავშირის, სამხრეთ კორეისა და კანადის ინვესტორებთან თანამშრომლობას გეგმავს.
ცნობისთვის: ყაზახეთს იშვიათი ლითონის, მინიმუმ, 15 ცნობილი საბადო აქვს, ხოლო ქვეყნის წიაღში 46 ტრლნ დოლარამდე ღირებულების რესურსს ვარაუდობენ. ექსპერტების შეფასებით, ყაზახეთს აქვს პოტენციალი, კონკურენცია ჩინეთს გაუწიოს, რომელიც ამჟამად იშვიათი ლითონის მსოფლიო წარმოების, დაახლოებით, 70%-ს აკონტროლებს.
მოამზადა ლადო სულაბერიძემ