რამდენ მაყურებელს დაუშვებენ თიმბერლეიქის კონცერტზე - დინამო არენას ექსპერტიზა ჩაუტარდა

„ბლექ სი არენას“ ინფორმაციით, 23 ივლისს თბილისის „დინამო არენაზე“ ჯასტინ თიმბერლეიქის კონცერტი გაიმართება.

ამორტიზირების საფრთხის გამო, „დინამო არენას“ სამხარაულის ეროვნულმა ბიურომ ექსპერტიზა ჩაუტარა და 1-ლი იარუსის 18-დან 6 სექტორის სათანადო მდგომარეობაში მოყვანის აუცილებლობაზე გააკეთა აქცენტი. შესაბამისად, სომხეთის ნაკრებთან 23 მარტს გამართული საფეხბურთო მატჩისას აღნიშნულ სექტორებზე მაყურებლები არ დაიშვებოდნენ.

სტადიონის ადმინისტრაციამ „ბიზნესპრესნიუსს“ დღეს დაუდასტურა, რომ ანალოგიური ვითარება იქნება 23 ივლისსაც, რაც იმას ნიშნავს, რომ ტრიბუნებზე ისევ დაახლოებით 4 000-ით ნაკლებ მაყურებელს დაუშვებენ.

ოფიციალური მონაცემებით, „დინამო არენა“ 54 139 ადამიანს იტევს, თიმბერლეიქის კონცერტისას კი დაახლოებით 50 000 ადგილი იქნება გამოყოფილი.

შეგახსენებთ, რომ სტადიონის ამორტიზირებულობის შესახებ პირველად, გასული წლის ივლისში, პრემიერ-მინისტრმა, ირაკლი კობახიძემ ისაუბრა. მას შემდეგ კი საქმეში სამხარაულის ეროვნული ბიურო ჩაერთო და შესაბამისი დასკვნაც დადო, რაც დაზიანებული 6-ვე სექტორის კონსტრუქციების სათანადო მდგომარეობაში მოყვანას ითვალისწინებს.

თავის მხრივ, სტადიონის ადმინისტრაციამ „ბიზნესპრესნიუსთან“ აღნიშნა, რომ მაყურებლების 100%-ს დაუშვებენ მხოლოდ მაშინ, როცა ეს 6-ვე სექტორი ექსპერტიზით დადგენილ ნორმებში იქნება.