მუშა ხელს ჩაანაცვლებს - ხელოვნური ინტელექტი 2033 წლისთვის გავლენას პროფესიების 40%-ზე მოახდენს
„2033 წლისთვის ხელოვნური ინტელექტის საბაზრო ღირებულება 4.8 ტრილიონ აშშ დოლარს გაუტოლდება და ციფრული ტრანსფორმაციის მთავარი ძალა გახდება“, - ამის შესახებ ინფორმაციას გაეროს ვაჭრობისა და განვითარების ორგანიზაციის კონფერენციის (UNCTAD) ანგარიშში ვკითხულობთ.
დოკუმენტში აღნიშნულია, რომ საბაზრო ფასის ამ მასშტაბით მომატება განპირობებული იქნება იმით, რომ AI უკან მოიტოვებს ინტერნეტს, ბლოკჩეინსა და ელექტრო სატრანსპორტო საშუალებებს.
თუმცა, მეორე მხრივ, მართალია, ხელოვნური ინტელექტი გარდაქმნის ეკონომიკასა და ქმნის ახალ შესაძლებლობებს, ამავდროულად რისკებსაც იწვევს, განსაკუთრებით ისეთებს, რომლებმაც შეიძლება ეკონომიკური ბალანსი დაარღვიონ.
UNCTAD-ის ანგარიშის მიხედვით, AI-ს შეუძლია პროდუქტიულობის გაზრდა, რაც მსოფლიოში არსებული პროფესიების 40%-ზე მოახდენს გავლენას და ეს, პირველ რიგში, მუშა ხელის ფაქტორს უკავშირდება.
რამდენიმე დღის წინ ამავე თემაზე ბილ გეიტსმა ისაუბრა და ჰიპოთეტურად განაცხადა, რომ კაცობრიობა მომავალში კვირაში მხოლოდ 2 დღეს იმუშავებს.
