ისტორიაში პირველი ქართველი, რომელმაც ევროპის 2 ტოპ ლიგა მოიგო - კვარაცხელიას პსჟ საფრანგეთის ჩემპიონია
ხვიჩა კვარაცხელია ისტორიაში პირველი ქართველია, ვინც ევროპის ტოპ 5 ჩემპიონატიდან 2-ის ჩემპიონი გახდა.
საფრანგეთის ჩემპიონატის 28-ე ტურში, პსჟ-მ ანჟერი 1:0 დაამარცხა და ქვეყნის ჩემპიონის სტატუსი ტურნირის დასრულებამდე 6 ტურით ადრე გაინაღდა. გამარჯვების გოლისას საგოლე პასი სწორედ კვარაცხელიამ შეასრულა.
ევროპის ტოპ 5 დივიზიონში, რაშიც ინგლისის პრემიერ ლიგა, გერმანიის ბუნდესლიგა, ესპანეთის ლა ლიგა, იტალიის სერია A და საფრანგეთის ლიგა 1 იგულისხმება, ქართველებს ისტორიაში სულ 2 ჩემპიონი გვყავს: კახა კალაძე - 2003-04 წლებში იტალიის ჩემპიონი („მილანთან“ ერთად) და ხვიჩა კვარაცხელია - 2022-23 წლებში იტალიის ჩემპიონი („ნაპოლისთან“ ერთად), ხოლო 2024-25 წლებში - საფრანგეთის ჩემპიონი (პსჟ-სთან ერთად).
ინფორმაციისთვის ვთქვათ, რომ პსჟ-მ საფრანგეთის ჩემპიონატი ზედიზედ მე-4-ედ, ისტორიაში კი მე-13-ედ მოიგო.
