„არაკეთილსინდისიერი მეწარმეები ექსკრემენტებს თევზების გამოსაკვებად მაინც იყენებენ“ - ირაკლი არაბული

„მიუხედავად იმისა, რომ საქართველოში ცხოველების ქათმის ექსკრემენტებით გამოკვება 2003 წლიდან არის აკრძალული, ამას ფარულად მაინც აკეთებენ, რაც ძალიან ცუდი ფაქტია“, - ამის შესახებ სურსათის უვნებლობის სპეციალისტმა, ირაკლი არაბულმა „რადიო პალიტრას“ გადაცემაში „თქვენი დრო“ განაცხადა.

„როგორც ამ პროდუქტის დეტალურმა შესწავლა-გამოკვლევამ აჩვენა, თვითონ ექსკრემენტები გარკვეული დაავადებების გადამტანი შეიძლება იყოს. ამის მიუხედავად, არაკეთილსინდისიერი მეწარმეები თევზების გამოსაკვებად მაინც იყენებენ, თუმცა, იმედს ვიტოვებ, მის გამომყენებელ ფერმერთა რაოდენობა თითზე ჩამოსათვლელი იქნება და ისინიც საამისოდ უკეთეს გზას გამონახავენ.

ასევე, რადგან თევზებზე ვსაუბრობთ - ქართულ ბაზარზე არსებული გაყინული თევზების 99% იმპორტირებულია. უნდა მოვერიდოთ ისეთი თევზის შეძენას, რომელსაც ფორმა შეცვლილი აქვს, რაც მიუთითებს იმაზე, რომ ტრანსპორტირების პროცესისას გალღვა და შემდეგ ისევ გაყინეს. ზოგადად, გაყინული პროდუქტის ხელმეორედ გაყინვა კანონით აკრძალულია“, - ამბობს არაბული.