„პროდუქციის ფასში აისახება“ - რა გავლენა ექნება შაქრის საიმპორტო გადასახადის ამოქმედებას

„ახალი გადასახადი ფასზე აისახება“ - ასე აფასებს „ბიზნესპრესნიუსთან“ დისტრიბუტორთა ასოციაციის პრეზიდენტი ლაშა რიჟამაძე შაქარზე საიმპორტო გადასახადის დაწესებას.

შეგახსენებთ, მთავრობამ შაქრის საიმპორტო გადასახადის დაწესების გადაწყვეტილება მიიღო. გადასახადი 22 აპრილიდან ამოქმედდება და ძალაში ერთი წლის განმავლობაში იქნება. შედეგად, იმპორტიორებს 1 კგ შაქრის შემოტანისთვის დამატებით 40 თეთრის გადახდა მოუწევთ, რაც ტონაზე 400 ლარიანი მოსაკრებელია.

„ნებისმიერი ტიპის ახალი გადასახადი ფასზე აისახება. ამასთანავე, გადასახადები იმ კომპანიების საქმიანობაზეც ნეგატიურად აისახება, რომლებიც ახორციელებენ იმპორტს. რა თქმა უნდა, გადასახადები აისახება პროდუქციის ფასში“, - აცხადებენ რიჟამაძე.

მისი თქმით, შაქარზე საიმპორტო გადასახადის დაწესება ადგილობრივი წარმოების ხელშეწყობას ემსახურება. თუმცა, რიჟამაძემ განმარტა, რომ მთავარი საკითხი იქნება ის, თუ რამდენად შეძლებს შაქრის მწარმოებელი ადგილობრივი კომპანია მოთხოვნის დაკმაყოფილებას და ფასების შენარჩუნებას.

„ალბათ, ადგილობრივი წარმოების ხელშესაწყობად არის ეს ახალი ტარიფები შემოღებული. თუმცა, მთავარი არის შემდეგი - ის ადგილობრივი საწარმო ბაზარს რამდენად დააკმაყოფილებს და რამდენად მოახერხებს იმას, რომ ფასი იქნას შენარჩუნებული. ეს საკმაოდ რთული პროცესი იქნება“, - დასძინა მან.

ამასთანავე, მოსალოდნელია, რომ ახალი გადასახადების ფონზე, გარკვეულწილად, შემცირდება შაქრის იმპორტიც.

„გარკვეულ ზეგავლენას მოახდენს, რა თქმა უნდა [იმპორტზე]. როდესაც პროდუქცია ძვირდება გაზრდილი გადასახადების გამო, ეს დამატებით კონკურენციის კუთხითაც ქმნის პრობლემას. შეიძლება ვთქვათ, რომ ყველაფერი ერთად აღებული, გარკვეულწილად იმპორტის მოცულობას შეამცირებს“, - განაცხადა ლაშა რიჟამაძემ.

საქართველოში შაქარი გაძვირდება

რაც შეეხება სტატისტიკას, მხოლოდ მიმდინარე წლის იანვარ-თებერვალში საქართველომ 11 084 ტონა შაქარი იყიდა, ჯამში ღირებულება 7 მლნ დოლარს აჭარბებს. მონაცემები აჩვენებს, რომ წლიურად იმპორტი თითქმის 47%-ით არის გაზრდილი. კერძოდ, 2024 წლის იმავე პერიოდში იმპორტირებული იყო 6 მლნ დოლარზე მეტი ღირებულების 7 548 ტონა შაქარი.

აღსანიშნავია ისიც, რომ წელს საქართველოს შაქრის იმპორტი 17 ცენტით გაუიაფდა (გადასახადების გარეშე). კერძოდ, გასულ წელს 1 კგ-ის საშუალო საიმპორტო ფასი გადასახადების გარეშე 80 ცენტი იყო, წელს კი 63 ცენტამდე შემცირდა.

საქართველოში შაქრის უდიდესი ნაწილი საფრანგეთიდან შემოდის. უფრო კონკრეტულად, ამ ბაზრის წილი შაქრის იმპორტში თითქმის 45%-ს შეადგენს. 5 ძირითადი სავაჭრო პარტნიორი შაქრის ნაწილში ასე გამოყურება:

• საფრანგეთი - 4 982 ტონა (3.16 მლნ დოლარის);
• უკრაინა - 1 276 ტონა (697 ათასი დოლარის);
• პოლონეთი - 1 080 ტონა (713 ათასი დოლარის);
• რუსეთი - 1 023 ტონა (650 ათასი დოლარის);
• ნიდერლანდები - 918 ტონა (647 ათასი დოლარის).