YouTube-ზე პირველი ვიდეოს ატვირთვიდან 20 წელი გავიდა - რომლებია ტოპ-10 ყველაზე ნახვადი ვიდეო პლატფორმაზე

Youtube-ზე პირველი ვიდეოს ატვირთვიდან 20 წელი გავიდა. აღნიშნული ვიდეოს ავტორის არხია „jawed“-ი, რომელიც პლატფორმის თანადამფუძნებელ ჯაუედ ქარიმს ეკუთვნის.

2025 წლის 24 აპრილის მონაცემებით, პლატფორმაზე ქარიმის არხს ისევ მხოლოდ ეს ისტორიული, 19-წამიანი, ვიდეო უდევს - „Me at the zoo“, რომელშიც სან დიეგოს ერთ-ერთ ზოოპარკში, სპილოების ვოლიერთანაა და შთაბეჭდილებების შესახებ საუბრობს. ქარიმის 1-ვიდეოიან არხს ამჟამად 5.36 მლნ გამომწერი ჰყავს.

ქარიმის ვიდეოს 356 898 201 ნახვა აქვს, Youtube-ის ტოპ 10 ყველაზე ნახვადი ვიდეოების სია, სახელების მიხედვით, კი ასეთია:

• Baby Shark Dance: 15.65 მლრდ ნახვა - ატვირთულია 2016 წლის 17 ივნისს;
• Despacito: 8.66 მლრდ ნახვა - ატვირთულია 2017 წლის 12 იანვარს;
• Wheels on the Bus: 7.17 მლრდ ნახვა - ატვირთულია 2018 წლის 24 მაისს;
• Johny Johny Yes Papa: 7.02 მლრდ ნახვა - ატვირთულია 2016 წლის 8 ოქტომბერს;
• Bath Song: 7.01 მლრდ ნახვა - ატვირთულია 2018 წლის 2 მაისს;
• See You Again: 6.58 მლრდ ნახვა - ატვირთულია 2015 წლის 6 აპრილს;
• Shape of You: 6.42 მლრდ ნახვა - ატვირთულია 2017 წლის 30 იანვარს;
• Phonics Song with Two Words: 6.31 მლრდ ნახვა - ატვირთულია 2014 წლის 6 მარტს;
• Uptown Funk: 5.49 მლრდ ნახვა - ატვირთულია 2014 წლის 19 ნოემბერს;
• Gangnam Style: 5.48 მლრდ ნახვა - ატვირთულია 2012 წლის 15 ივლისს.

აღსანიშნავია, რომ ვიდეო, რომელმაც პირველმა დააგროვა 1 მლნ ნახვა, 2005 წლის ნოემბერში, რონალდინიოს მონაწილეობით Nike-ის სარეკლამო რგოლი იყო; პირველი მილიარდნახვიანი ვიდეო კი, 2012 წლის დეკემბერში, Gangnam Style გახდა; ხოლო 10 მლრდ ნახვის რეკორდი პირველმა Pinkfong-ის Baby Shark-მა, 2022 წლის იანვარში, მოხსნა.

დღესდღეობით მსოფლიოში ერთ-ერთი ყველაზე პოპულარული და გავრცელებული სოციალური ქსელი ჯაუედ ქარიმმა, სტივ ჩენმა და ჩად ჰარლიმ, 2005 წლის 14 თებერვალს დააარსეს, 1 წლის შემდეგ კი, 1.65 მლრდ აშშ დოლარის სანაცვლოდ, Google-ს მიჰყიდეს.

Youtube-ის განცხადების თანახმად, პლატფორმაზე დღეში საშუალოდ 20 მლნ ვიდეო იტვირთება, ხოლო მომხმარებლების მიერ ვიდეოთა მოწონების რიცხვი დღიურად 3.5 მლრდ-ს უტოლდება.

CNBC-ის ინფორმაციით, Youtube-მა, 2021-2024 წლების ინტერვალში, კონტენტ კრეატორებს, მონეტიზაციის სახით, 70 მლრდ აშშ დოლარი გადაუხადა.

NBC News-ის ცნობით, ამ მომენტისთვის, პლატფორმაზე ატვირთულ ვიდეოთა ჯამური რაოდენობა 20 მლრდ-ს აღწევს.