თბილისის ცენტრში გასაყიდი მიწა აღარ დარჩა

ბოლო რამდენიმე თვეა, თბილისში მიწებზე მოთხოვნა გაიზარდა.

როგორც გაზეთი "რეზონანსი" წერს, დეველოპერების ინფორმაციით, რეალიზაცია იმდენად აქტიური გახდა, რომ დიდი მშენებლობებისთვის ფართი, პრაქტიკულად, არ დარჩა. რაც შეეხება მყიდველს, აშკარა უპირატესობა უცხოელებს აქვთ, უფრო კი, ერაყელი, ეგვიპტელი და არაბი ინვესტორები აქტიურობენ. ინტერესი უკრაინელი ბიზნესმენების მხრიდანაც შეიმჩნევა.

უძრავი ქონების სააგენტოებში აცხადებენ, რომ მიწის რეალიზაციის ზრდას ფასზე გავლენა არ მოუხდენია. დედაქალაქის გარეუბნებში 1 კვ/მ საწარმოო მიწის ფასი, საშუალოდ, 30-50 დოლარის ფარგლებშია, ხოლო ცენტრალურ უბნებში ფასი 100-120 დოლარიდან იწყება და 200 დოლარს აჭარბებს.

უძრავი ქონების სააგენტო "კიბის" დირექტორი ნელი გოგუაძე განმარტავს, რომ მიწაზე მოთხოვნა იმდენად დიდია, რომ მიწოდების პრობლემა შეიქმნა. საცხოვრებელი ფართის გაყიდვის მხრივ ტენდენცია დიდად არ შეცვლილა, თუ არ ჩავთვლით იმას, რომ გაჩნდა ინტერესი ახალი კორპუსების მიმართ. ეს, უმეტესწილად, ცენტრალურ უბნებს შეეხება. გარეუბნებში მოთხოვნა კვლავ ძველ კორპუსებზეა, მაგრამ რეალიზაციის მხრივ ისევ პრობლემაა.

"უძრავი ქონების ბაზარზე გაუმჯობესება დიდად არ შეიმჩნევა, თუმცა ტენდენცია შეიცვალა და კვლავ გაჩნდა ინტერესი მიწის მიმართ. ბოლო დრომდე მიწის გაყიდვა ძალიან გვიჭირდა, მაგრამ ახლა დიდი ნაკვეთები რეალურად არ მოგვეპოვება. მოთხოვნა-მიწოდების ბალანსი დაირღვა. სამშენებლო სექტორში მასშტაბური პოექტების განსახორციელებლად მიწის ფართი თბილისის ცენტრალურ უბნებში უკვე აღარც არის. ბაზარზე ძირითადი მყიდველი უცხოელი მოქალაქეები არიან. განსაკუთრებით უკრაინელი, ერაყელი და ეგვიპტელი ინვესტორები აქტიურობენ.

ვისაც შესაძლებლობა აქვს, უკვე ახალ კორპუსებში ცდილობს ბინის ყიდვას. ძველი კორპუსები ცენტრალურ უბნებში უკვე აღარც იყიდება. ეს მიმართულება გაცილებით უკეთ მუშაობს გარეუბნებში, სადაც შედარებით ახალი და მყარი კორპუსებია. ბოლო დროს ახალი კორპუსებით დაინტერესდნენ გლდანსა და ვარკეთილშიც. რამდენადაც ვიცი, ამ უბნებში ბინები მშენებლობის დასრულებამდე მთლიანად გაიყიდა", - განმარტავს გოგუაძე.

უძრავი ქონების სააგენტოების მეორე ნაწილში აბსოლუტურად განსხვავებული მოსაზრება აქვთ. დეველოპერების ეს ნაწილი თვლის, რომ უძრავი ქონების ბაზარზე მდგომარეობა თითქმის არ შეცვლილა და რეალიზაციის პრობლემა მოუგვარებელია.

კომპანია "ბერუკას" დირექტორი ავთანდილ გუგეშაშვილი განმარტავს, რომ თბილისში ბინა ძნელად იყიდება, მიზეზი - ფულის დეფიციტია, რის გამოც ხალხს უძრავი ქონების შეძენა უჭირს. "ბოლო პერიოდში გარკვეული გავლენა იქონია რეგიონში მიმდინარე პროცესებმაც.

რთული სიტუაციაა. ბინის გაყიდვა დედაქალაქის ყველა უბანში გვიჭირს. ცოტაა ისეთი ადამიანი, ვისაც ჯერ კიდევ აქვს ინტერესი და ფინანსური შესაძლებლობა. უფრო მეტად ის კატეგორიაა, რომელსაც აქვს მუდმივი სამსახური, მაღალი ხელფასი და განვადებით ბინის შეძენა შეუძლია. ამ კატეგორიას ემატება ისიც, ვინც ბინის ყიდვას საზღვარგარეთ მყოფი ოჯახის წევრების დახმარებით ახერხებს.

ტენდენცია, რომ ბიზნესმენები უძრავი ქონების შეძენით ინტერესდებოდნენ, არ შეიმჩნევა. მოთხოვნა ცოტათი შენარჩუნდა გარეუბნებში მდებარე მეორად ბინებზე, რადგან გაცილებით იაფია. ცენტრში, სადაც ასეთი კორპუსები ისედაც ნაკლებად შემორჩა, მომხმარებელი ახალაშენებულს მეტ უპირატესობას ანიჭებს", - განმარტავს ავთანდილ გუგეშაშვილი.

მისივე ინფორმაციით, დღესდღეობით ცოტა უკეთესი მდგომარეობაა ქირასა და გირაოზე, ფასები ამ სეგმენტში დაახლოებით 15-20%-ის ფარგლებში შემცირდა.

"ბაზარზე რამე პოზიტივის დანახვა მიჭირს, რადგან რეალურად ვერ ვხედავ ცვლილებას. მართალია, ქირასა და გირაოზე მოთხოვნამ მოიმატა, სამაგიეროდ, რეალიზაციის მხრივ ისევ პრობლემაა. ძალიან ცუდი სიტუაციაა. ამას დაემატა ისიც, რომ უკვე ომია აზერბაიჯანსა და სომხეთში, რაღაც დონეზე ამანაც იმოქმედა. მთავარია, კონფლიქტი გარეშე ძალების მიერ კიდევ უფრო არ გაღვივდეს, რისი საშიშროებაც არის", - განმარტავს ავთანდილ გუგეშაშვილი.

უძრავი ქონების რეალიზაციის პრობლემაზე საუბრობენ დამოუკიდებელი მაკლერებიც, მაგრამ იქვე ადასტურებენ, რომ ახალი კორპუსების მიმართ ინტერესი გაზრდილია.

დილერ გიორგი მამასახლისის თქმით, ახალ კორპუსებშიც მოთხოვნა, ძირითადად, დაბალი ფასის ერთ ან ოროთახიან ბინებზეა. იშვიათად შეიძლება, ვინმემ ყიდვა განვადების გვერდის ავლით შეძლოს.

"ბევრია გასაყიდი ბინა, მაგრამ არ გვყავს რეალური მყიდველი. ძნელად დასაჯერებელია, მაგრამ ზოგჯერ მთელი თვე ისე გავა, 2 ბინის გაყიდვას ძლივს ვახერხებთ, ხოლო ზოგიერთი ბინა თვეობით არის გაყიდვაში. ცოტა უკეთესი მდგომარეობაა ახალ კორპუსებში, სადაც პატარა ფართის რეალიზაცია ოდნავ გაუმჯობესდა.

ადრე ხალხი უფრო ფულადი გზავნილებით იძენდა ბინას, ახლა ეს ტენდენციაც შეიცვალა. თითქმის ყველა საცხოვრებელ ფართს განვადებით ყიდულობს", - განმარტავს მამასახლისი.

უძრავი ქონების ბაზრის პრობლემა, ფაქტობრივად, უცვლელია. დადებითი ტენდენციის მიუხედავად, რასაც მიწაზე მოთხოვნის ზრდა ადასტურებს, არსებითი არაფერი მომხდარა.

მარი ჩიტაია

წყარო: გაზეთი "რეზონანსი"