რა კატეგორიის ბინები იყიდება თბილისში 15-25 ათას დოლარად?

„ყველაზე დიდი მოთხოვნა 1-2-ოთახიან ბინებზეა“

ბოლო ხანებში სოციალურ ქსელებში ხშირად წააწყდებით შემოთავაზებას - „ბინები თბილისში 15-25 ათას დოლარად“. „ბიზნესპრესნიუსი“ დაინტერესდა - რა კატეგორიის ბინებია ეს და უძრავი ქონების ბაზარზე გაიაფების ტენდენცია ხომ არ იკვეთება?

ამ შეკითხვით საინფორმაციო ვებგვერდ saqme.ge-ს რედაქტორს, ლელა არაბულს მივმართეთ:

ლელა არაბული - თუ შარშანდელ სიტუაციას შევადარებთ, ბინები წელს მართლაც გაიაფებულია. ჩემი აზრით, იმ ადამიანებისათვის, ვისაც შემოსავალი დოლარში აქვს, ან რაღაც დანაზოგის მფლობელია, უძრავი ქონების შესაძენად ახლა ძალიან კარგი პერიოდია. მათთვის საკმაოდ ადვილი და ხელსაყრელი იქნება ბინის შეძენა.

ჩვენი მოსახლეობის მსყიდველობითუნარიანობა დაბალია, ამიტომ მოთხოვნილება უფრო იაფფასიან ბინებზეა, ამავე დროს, საქართველოში ბევრს აქვს ბანკის ვალი, აქედან გამომდინარე, ბევრი ყიდის ბინას, რომ ვალი დაფაროს და შედარებით პატარა ბინის ყიდვას ამჯობინებს. ქალაქში გაჩნდა მანსარდული სტილის დაშენებები, რომელიც ასევე იაფია. ასეთი ბინები 20-24 ათასადაც იყიდება, ძირითადად ვაჟა-ფშაველას კვარტლებში. ჩვენი დაკვირვებით, ბევრი ყიდულობს შავ კარკასს - ამ ტიპის უძრავი ქონება საკმაოდ კარგად იყიდება, რადგან იაფია. დედაქალაქის ცენტრში 1 კვ.მ. ფართობი 400-420 დოლარი იშვიათად ღირს, თუმცა მანსარდული ტიპის ბინები დაახლოებით ამ ფასად იყიდება.

უძრავი ქონების სააგენტო „კიბეს“ ხელმძღვანელი და დამფუძნებელი ნელი გოგუაძეც ამბობს, რომ იაფფასიანი ბინები ძირითადად გარეუბნებში გვხვდება:

- მეც ვფიქრობ, რომ იაფფასიანი ბინები ძირითადად გარეუბნებშია, მაგრამ გარეუბანსაც გააჩნია. 20-21 ათასად შეიძლება იყიდოთ შედარებით კარგი ბინა. სხვათა შორის, თემქაზე იყო საერთო საცხოვრებელი, რომელიც პრივატიზებული იყო და იქ იყიდებოდა ბინები საკმაოდ იაფად. იაფია მცირე ფართის ბინები - ისინი უფრო ადვილად იყიდება, ადვილად ქირავდება და მათზე მოთხოვნაც უფრო დიდია. ერთოთახიან ბინებში 1 კვ.მ. 400-450 დოლარად იყიდება, მაგრამ ეს ძირითადად შავი კარკასებია, რომელიც არ არის დატიხრული და მხოლოდ მეტალოსპლატმასის კარ-ფანჯარა აქვს ჩასმული. მშენებლებსაც უღირთ ასეთი ბინების აშენება და გაყიდვა, რადგან 20-25 ათასი დოლარი - ეს არის თანხა, რომელსაც ამ ეტაპზე ყველაზე მეტად წვდება ჩვენი მოსახლეობა. ჩემი დაკვირვებით მაღალფასიანი ბინები, რომლებიც ძვირია, თვეების განმავლობაში არ იყიდება. ამიტომ ანიჭებენ მშენებლები ერთ და ოროთახიან ბინებს უფრო დიდ მნიშვნელობას: ერთოთახიან ბინებს ჩვენი მოქალაქეები ან საცხოვრებლად ყიდულობენ, ან იმისათვის, რომ გააქირაონ და შემოსავლის წყაროდ აქციონ.

ნელი გოგუაძის აზრით, უძრავი ქონების ბაზარზე მიწოდება აჭარბებს მოთხოვნას და გაიაფების ერთ-ერთი მთავარი მიზეზიც ეს არის: „დღეს ქალაქში ძალიან ბევრი მშენებლობა მიმდინარეობს, შესაბამისად, ამ ბაზარზე მიწოდება უფრო მეტია, ვიდრე მოთხოვნა. თანაც, უკვე გითხარით, რომ პატარა ბინებზე უფრო მეტია მოთხოვნა, რადგან მოსახლეობის დიდ ნაწილს არ შეუძლია მაღალფასიანი ბინის ყიდვა, არადა ოჯახი როცა იზრდება, მას ახალი, დამატებითი ფართობი სჭირდება. როდესაც ახალი ოჯახი იქმნება, ახალგაზრდები უმეტესწილად 1, ან 2-ოთახიან ბინაში გადადიან, საბოლოო ჯამში კი, ყველაზე დიდი რაოდენობით სწორედ ასეთი ბინები იყიდება. საზოგადოებრივი ფონია ასეთი - გაფართოებას უმეტესობა ვერ ახერხებს“, - აცხადებს უძრავი ქონების სააგენტოს ხელმძღვანელი.

„ბიზნესპრესნიუსმა“ ამ საკითხზე კომენტარი უძრავი ქონების ექსპერტ შოთა გუჯაბიძეს სთხოვა:

შოთა გუჯაბიძე - მე არ ვფიქრობ, რომ ეს არის ტენდენცია: როდესაც ბინა ასე იაფად იყიდება, ეს უფრო გარემოებათა დამთხვევაა, თანაც საკითხავია, 15-16 ათასად გაყიდული ბინის ფართობი რამდენი იყო? ასევე საკითხავია კიდევ ერთი რამ - როგორია ამ ბინის ხარისხი? მეც ვიცი, რომ ზოგიერთი კომპანია 60 კვ.მ.-მდე ბინას, რომელსაც მშენებლობის ნებართვა არ სჭირდება, 7-8 ათას დოლარად აშენებს, მაგრამ ეს სულ სხვა საკითხია, რადგან ეს კერძო სახლებია. შესაბამისად, ამ 8 ათას დოლარს უნდა დავამატოთ მიწის ნაკვეთის ღირებულება, რომელზე ვაშენებთ და სხვა ხარჯებიც, რომელიც სახლის მფლობელმა უნდა გასწიოს.

შოთა გუჯაბიძის აზრით, ფასების შემცირების ერთ-ერთი მიზეზი მაღალი კონკურენციაა: „გეთანხმებით, რომ უძრავი ქონების ბაზარზე კონკურენცია მაღალია, ბევრი კომპანია სთავაზობს მყიდველს შეღავათებს, ახალ-ახალ აქციებს, მაგრამ საცხოვრებელ ბინებზე ფასის კლება ტენდენციად არ შეიძლება მივიჩნიოთ. ეს ვარდნითი ეფექტები დროებითია და ხშირად სეზონური ფაქტორითაც არის გამოწვეული. რაც შეეხება მანსარდული ტიპის ბინას, ის შეიძლება იყიდოთ 18-20 ათას დოლარად, მაგრამ ეს ბინა, როგორც უძრავი ქონება, როგორც მყარი აქტივი, არ გამოგადგებათ - ის არარენტაბელური იქნება“, - აცხადებს გუჯაბიძე.

ხათუნა ჩიგოგიძე