გერმანია ქვეყნის ყველა საზღვართან კონტროლს ამკაცრებს - როდემდე იმოქმედებს შეზღუდვა
16 სექტემბრიდან გერმანიის მთავრობა ქვეყნის ყველა საზღვართან კონტროლს გაამკაცრებს. მიზეზი საზოგადოების ისეთი საფრთხეებისგან დაცვაა, როგორიცაა ისლამური ექსტრემიზმი.
Reuter-ი წერს, რომ გერმანიის შინაგან საქმეთა მინისტრის ნენსი ფეზერის ინფორმაციით, კონტროლი თავდაპირველად 6 თვის განმავლობაში იმოქმედებს. მთავრობამ ასევე შეიმუშავა სქემა, რომელიც საშუალებას მისცემს ხელისუფლებას, უარი უთხრას ქვეყნის საზღვარზე მოსულ მიგრანტებს.
”ჩვენ ვაძლიერებთ შიდა უსაფრთხოებას და ვაგრძელებთ მკაცრ ზომებს არალეგალური მიგრაციის წინააღმდეგ,” - განაცხადა ფეზერმა და აღნიშნა, რომ მთავრობამ ევროკომისიას და მეზობელ ქვეყნებს დაგეგმილი კონტროლის შესახებ უკვე შეატყობინა.
