Sky News - სანქციების მიუხედავად ძვირადღირებული მანქანები რუსეთში საქართველოს გავლით შედის

სანქციების მიუხედავად ძვირადღირებული მანქანები რუსეთში საქართველოს გავლით შედის. ამის შესახებ გამოძიებას ბრიტანული ტელეარხი Sky News-ი ავრცელებს.

Sky News-ის ინფორმაციით, მათ საქართველოში ბრიტანული და ევროკავშირის სანქციებით აკრძალული მანქანების რუსეთში საქართველოს გავლით შეყვანის „რთული, მაგრამ დახვეწილი სქემა“ აღმოაჩინეს.

Sky News -ის გამოძიების თანახმად, ადამიანების ერთ ჯგუფს მანქანების თბილისის შოურუმებიდან, ფოთის ან ბათუმის პორტებიდან რუსეთის საზღვრამდე, კერძოდ, ლარსის გამშვებ პუნქტთან მიყვანა ევალება.

„მანქანების სასაზღვრო პუნქტთან მიყვანის შემდეგ, მათ იქ რამდენიმე დღით ტოვებენ, ვიდრე შესაბამისი დოკუმენტაცია მზადდება. დოკუმენტაციას თავისი პრობლემები აქვს: ევროპული ქვეყნების მიერ რუსეთის წინააღმდეგ სანქციების შემოღების შემდეგ, საქართველომ რუსეთში მანქანების გაგზავნაზე საკუთარი აკრძალვებიც შემოიღო, თუმცა, მანქანების საზღვარზე გადასაყვანად რამდენიმე საშუალება მაინც არსებობს.

ერთ-ერთი გზაა მანქანების სომხეთში რეგისტრირება და განბაჟება, სადაც მათ სატრანზიტო სარეგისტრაციო ნომრები ეძლევათ, რის შემდეგად ისინი ლარსის გამშვებ პუნქტთან მიჰყავთ. ვინაიდან, საქართველოს მოქალაქეებს რუსეთში შესვლა უვიზოდ შეუძლიათ (და პირიქით), მანქანის საზღვარზე გადაყვანა ძალიან მარტივდება.

გამოცემა აღნიშნავს, რომ ამ მეთოდით, პიროვნებას, რომელსაც მანქანა რუსეთში გადაჰყავს, რაიმე კონკრეტული დანაშაულის ჩადენაში ვერ დაადანაშაულებ, თუმცა მთლიანი სქემა სანქციებისთვის გვერდის ავლას წარმოადგენს. ასევე, ამ გზით რუსეთში გადაყვანილი მანქანები საბაჟო მონაცემებში არ ჩანს”, - ნათქვამია რეპორტაჟში.

აღინიშნება, რომ ამ გზით რუსეთში BMW-ს, Lexus-ის, Mercedes-ის, Range Rover-ის, Porsche-ს და Lamborghini-ის ძვირადღირებული მოდელები შედის.