საქართველოს აეროპორტებით გადაყვანილი მგზავრების რაოდენობა გაიზარდა - როგორია ახალი მაჩვენებლები
საქართველოს სამოქალაქო ავიაციის სააგენტოს ინფორმაციით, მიმდინარე წელს თბილისისა და ბათუმის საერთაშორისო აეროპორტებით გადაყვანილი მგზავრების რაოდენობა მნიშვნელოვნად, ქუთაისის აერპორტის შემთხვევაში კი მცირედით არის გაზრდილი.
კერძოდ, 2024 წლის პირველ 9 თვეში, თბილისის საერთაშორისო აეროპორტი 3 622 830 მგზავრს მოემსახურა. ზრდა 2023 წლის ანალოგიურ პერიოდთან შედარებით 31%-ს შეადგენს, ხოლო 2019 წლის იანვარ-სექტემბერთან შედარებით 22%-ს.
ქუთაისის საერთაშორისო აეროპორტის მეშვეობით გადაყვანილ იქნა 1 284 997 მგზავრი. მგზავრთნაკადის ზრდა 2023 წლის პირველ ცხრა თვესთან შედარებით 6%-ს შეადგენს. 2019 წლის ანალოგიურ პერიოდთან შედარებით კი, ქუთაისის აეროპორტი 104%-ით მეტ მგზავრს მოემსახურა.
ბათუმის საერთაშორისო აეროპორტი 753 485 მგზავრს მოემსახურა. ზრდა 2023 წლის იანვარ-სექტემბერთან შედარებით 43%-ია, ხოლო 2019 წლის პირველ ცხრა თვესთან მიმართებაში - 44%-ი.
2024 წლის იანვარ-სექტემბერში საქართველოს აეროპორტები რეგულარული და არარეგულარული რეისებით 5 686 748 მგზავრს მოემსახურა. აღნიშნული მაჩვენებელი 26%-ით აღემატება 2023 წლის ანალოგიურ პერიოდში მიღებული მგზავრების რაოდენობას და 37%-ით აჭარბებს 2019 წლის იანვარ-სექტემბრის მონაცემებს.
მიმდინარე წლის 9 თვის განმავლობაში, საქართველოს აეროპორტებში ჯამში 24 348 ავიარეისი შესრულდა. 2023 წლის პირველ ცხრა თვესთან შედარებით ფრენების ზრდამ 25%-ი შეადგინა, ხოლო 2019 წლის ანალოგიურ პერიოდთან შედარებით 26%.
