რა ღირს მსოფლიოს ყველაზე ძვირადღირებული ღვინოები - Wine-Searcher-ის ახალი რეიტინგი
Wine-Searcher-მა 2024 წლის ყველაზე ძვირადღირებული ღვინოების ტრადიციული რეიტინგი შეადგინა.
გამოცემის მონაცემებით, მსოფლიოში ყველაზე ძვირადღირებული ღვინოების ღირებულება ათი წლის განმავლობაში 33%-ით გაიზარდა და ეს ზრდა საფონდო ბირჟების შემოსავალს აჭარბებს.
მაგალითად, საფონდო ინდექს S&P 500 Index-ში ინვესტიციებმა, რომელიც ყველაზე დიდი კაპიტალიზაციის მქონე 500 საჯარო კომპანიის 503 აქციისგან შედგება, ბოლო ათი წლის განმავლობაში შემოსავლის მხოლოდ 11% მოიტანა.
Wine-Searcher წერს, რომ 2023 წლის სიაშიც წლევანდელი ღვინოები იყო შესული, მაგრამ მათი ღირებულება ერთი წლის წინ 12%-ით მეტი იყო. გასულ წელს ღვინის ფასი, 2022 წელთან შედარებით, 29%-ით გაიზარდა.
გამოცემის სიაში არ მოხვდა ღვინოები, რომელთა შეთავაზების რაოდენობა ათ ბოთლზე ნაკლები იყო. სიაში, ასევე, არ შედის ღვინოები, რომელთა ბოლო რელიზიც ხუთ წელზე მეტი ხნის წინ გამოვიდა.
2024 წლის ყველაზე ძვირადღირებული ღვინოებია:
- Leroy Musigny Grand Cru - 37,719 დოლარი
- Domaine de la Romanee-Conti Romanee-Conti Grand Cru - 24,676 დოლარი
- Leroy Domaine d'Auvenay Chevalier-Montrachet Grand Cru - 23,306 დოლარი
- Leroy Domaine d'Auvenay Criots-Batard-Montrachet Grand Cru - 22,184 დოლარი
- Leroy Domaine d'Auvenay Batard-Montrachet Grand Cru - 19,430 დოლარი
- Domaine Leflaive Montrachet Grand Cru - 18,886 დოლარი
- Domaine Georges & Christophe Roumier Musigny Grand Cru - 17,754 დოლარი
- Egon Muller Scharzhofberger Riesling Trockenbeerenauslese, Mosel - 16,809 დოლარი
- Domaine Roumier Echezeaux Grand Cru - 14,546 დოლარი
- Leroy Chambertin Grand Cru - 13,510 დოლარი
გამოცემას შედარებისთვის 2014 წლის რეიტინგი მოჰყავს და წერს, რომ ათი წლის წინ ყველაზე ძვირადღირებული ღვინოების სიას Henri Jayer Richebourg Grand Cru ედგა სათავეში, რომლის ღირებულებაც 16,2 ათასი დოლარი იყო. ამასთან, 2014 წლის ტოპ 10-ეულში შემავალი ღვინოების საშუალო ფასი 7,9 ათასი დოლარი იყო, მაშინ, როცა წელს, თითქმის, სამჯერ მეტი, 20,9 ათას დოლარია.
მოამზადა ლადო სულაბერიძემ