კონდიციონერების მიმწოდებლებს ახალი ვალდებულებები უჩნდებათ - როდის ამოქმედდება ცვლილებები
მთავრობამ „ჰაერის კონდიციონერის ენერგოეტიკეტირების წესების“ შესახებ ტექნიკური რეგლამენტი დაამტკიცა. დოკუმენტის მიხედვით განისაზღვრა რიგი ვალდებულებები, რაც ტექნიკის მიმწოდებლებს უჩნდებათ.
მოთხოვნები არ გავრცელდება შემდეგი ტიპის კონდიციონერებზე:
- მოწყობილობებზე, რომელთა ენერგიის წყარო არაელექტრულია;
- კონდიციონერებზე, რომელთა კონდენსატორის ან ამაორთქლებლის მხარის, ან ორივე მათგანის სითბოს გადაცემის საშუალება არ არის ჰაერი.
ამასთანავე, ტექნიკური რეგლამენტით განისაზღვრა ჰაერის კონდიციონერის მიმწოდებლის ვალდებულებები, კერძოდ:
- კონდიციონერებს მითითებული უნდა ჰქონდეს ენერგოეფექტურობის კლასები (A-დან G-მდე);
- კონდიციონერების ენერგოეფექტურობის შესახებ ცნობა შეფუთვაზე უნდა იყოს ეტიკეტირებული და ამავდროულად, წარმოდგენილი უნდა იყოს მიმწოდებლის ვებ-გვერდზე.
კონდიციონერის შესახებ ხელმისაწვდომი უნდა იყოს შემდეგი სახის ინფორმაცია:
- მიმწოდებლის სახელწოდება ან სავაჭრო ნიშანი;
- შიდა ჰაერის კონდიციონერის ან ჰაერის კონდიციონერის შიდა და გარე ელემენტების მოდელის იდენტიფიკატორი;
- გაგრილების ან/და გათბობის რეჟიმში შიდა და გარე ხმის სიმძლავრის დონე სტანდარტულ ნომინალურ პირობებში;
- გამოყენებული გამაგრილებლის სახელი და გლობალური დათბობის პოტენციალი (GWP).
აღსანიშნავია ისიც, რომ კონდიციონერის შესახებ რეკლამაში ენერგოეფექტურობის კლასი უნდა მიეთითოს იმ შემთხვევაში, თუ რეკლამა ენერგიასთან ან ფასთან დაკავშირებულ ინფორმაციას შეიცავს.
აღნიშნული ცვლილებები ძალაში 2025 წლის 31 დეკემბრიდან შედის.
შეგახსენებთ, „ბიზნესპრესნიუსი“ უკვე წერდა, რომ საქართველოში გარდა კონდიციონერებისა, იცვლება სარეცხის მანქანების, მაცივრების, ნათურებისა და სხვა მოწყობილობების რეალიზაციის წესები. უფრო კონკრეტულად, საუბარია, ენერგოეტიკეტირებაზე, რომელიც მყიდველისთვის თვალსაჩინო ადგილას, გასაგებ, ამასთან, ქართულ ან ინგლისურ ენებზე უნდა იყოს განთავსებული.
