პრემიერ-მინისტრმა თელავის სპორტის სასახლე დაათვალიერა
პრემიერ-მინისტრმა ირაკლი კობახიძემ თელავის სპორტის სასახლე დაათვალიერა.
როგორც მთავრობის მეთაურმა აღნიშნა, იყო გარკვეული სამართლებრივი პრობლემები, რომელიც სრულად არის მოგვარებული და სპორტული კომპლექსი უახლოეს მომავალში გაიხსნება.
“კომპლექსი აშენდა, თუმცა იყო გარკვეული სამართლებრივი პრობლემები. დღეს უკვე პრობლემები სრულად არის მოგვარებული. უახლოეს მომავალში კომპლექსი გაიხსნება და თელაველებისთვის ხელმისაწვდომი იქნება. ვიდრე კომპლექსი საბოლოოდ გაიხსნება, გარკვეული სამუშაოები ჩატარდება, თუმცა, ამას დიდი დრო არ დასჭირდება. ჩვენი სურვილია, რომ სპორტული ინფრასტრუქტურა თელავში კიდევ უფრო მეტად გავაფართოოთ“, - განაცხადა პრემიერმა.
მთავრობის მეთაურის თქმით, თელავს საცურაო აუზი სჭირდება და ამაზე ზრუნვა უკვე დაწყებულია.
“დღეს კულტურისა და სპორტის მინისტრის პირველ მოადგილეს ვთხოვე, რომ საკითხი მოამზადოს. თელავს ასევე სჭირდება მულტიფუნქციური სპორტული ინფრასტრუქტურა. ამაზე მუშაობა დაწყებული გვაქვს. ყველაფერი გაკეთდება იმისათვის, რომ უახლოეს მომავალში თელაველები ასეთი ინფრასტრუქტურით იყვნენ უზრუნველყოფილები. რაც შეეხება არსებულ დარბაზს, ეს სპორტული ცენტრი უახლოეს მომავალში გაიხსნება“, - განაცხადა პრემიერმა.
მთავრობის პრესსამსახურის ინფორმაციით, თელავის მულტიფუნქციური სპორტის სასახლის პროექტისთვის 22 მილიონ ლარამდე გამოიყო. სამუშაოები კანადურმა კომპანია “ბეჰლენმა“ შეასრულა. კომპლექსი მოიცავს დიდ და პატარა დარბაზს, რომლებიც 2 000 მაყურებელზეა გათვლილი, ასევე გასახდელებს, ადმინისტრაციულ სივრცეებს. კომპლექსი ამ ეტაპზე შპს „სპორტმშენსერვისის“ დაქვემდებარებაშია.
“კომპლექსი საერთაშორისო სტანდარტებს აკმაყოფილებს. სპორტის სასახლეში შესაძლებელია სპორტის სხვადასხვა სახეობაში, მათ შორის კალათბურთში, ფუტსალში, ფრენბურთში, ხელბურთში, კარატეში, ძიუდოში, ჭიდაობასა და ტანვარჯიშში საერთაშორისო ტურნირების, ევროპისა და მსოფლიოს ასაკობრივი ჩემპიონატების გამართვა”, - აღნიშნულია მთავრობის პრესსამსახურის მიერ გავრცელებულ ინფორმაციაში.