რა დადებითი და უარყოფითი გავლენა აქვს ორგანიზმზე ყავის მოხმარებას - Health-ის ახალი კვლევა

კოფეინი ენერგიის დონესა და კოგნიტურ შესაძლებლობებს ნერვული სისტემის სიმულაციის გზით ზრდის. თუმცა ორგანიზმზე მისი ეფექტი შესაძლოა, დღის დროის მიხედვით განსხვავდებოდეს.

ინფორმაციას Health ავრცელებს.

ყავა, ასევე, კორტიზოლის დონეზე მოქმედებს. კორტიზოლი ადამიანის ორგანიზმში იმუნური ფუნქციის, მეტაბოლიზმის, ანთებისა და სტრესის რეგულირებისთვის მთავარ როლს ასრულებს. ჰორმონის მაღალი დონე ქოლესტერინის მომატებასთან, სისხლში შაქრის მატებასთან, მაღალ არტერიულ წნევასთან და მუცლის ჭარბ ცხიმთან არის დაკავშირებული.

მეცნიერების რჩევით, მძიმე სტრესის ქვეშ, ავადმყოფობის დროს, დატვირთულ დღეს და ძილის ნაკლებობისას ყავის მოხმარება უნდა შემცირდეს.

კიდევ ერთმა კვლევამ დაადგინა, რომ საკმარისი ძილის გარეშე ყავის დალევა გავლენას ახდენს ორგანიზმის უნარზე, სისხლში შაქრის დონე გამოიყენოს და დაარეგულიროს. ექსპერიმენტის დროს უძილობის მქონე მონაწილეებმა ფინჯანი ყავა დალიეს, რომელიც 300 მგ კოფეინს შეიცავდა. 30 წუთის შემდეგ მათ სისხლში შაქრის დონე 50%-ით გაიზარდა.

დღის მეორე ნახევარში ყავის დალევამ შესაძლოა, უკეთეს გონებრივ მუშაობასა და ფიზიკურ შესრულებას ხელი შეუწყოს. ვარჯიშამდე 60 წუთით ადრე კოფეინის შემცველი საკვების მიღების რეკომენდაციას სპორტული კვების საერთაშორისო საზოგადოებაც იძლევა. კერძოდ, კოფეინს შეუძლია, შრომისუნარიანობა და ენერგიის გამომუშავება გაზარდოს, ასევე, მეტაბოლიზმი და ორგანიზმში ცხიმის დაშლა დააჩქაროს.

თუმცა სასმელს გულ-სისხლძარღვთა სისტემაზე პოტენციურად უარყოფითი გავლენა აქვს. მეცნიერები ამბობენ, რომ ღამის მოსვენებამდე 6-8 საათით ადრე კოფეინის მიღება ძილის ხარისხს აუარესებს. ყავას, ასევე, შეუძლია, ძილის მთლიანი დრო შეამციროს, ჩაძინების დრო გაახანგრძლივოს და კოფეინზე დამოკიდებულების განვითარებას ხელი შეუწყოს.

კოფეინის მიმართ მგრძნობელობა გენეტიკაზე არის დამოკიდებული. კვლევის შედეგების თანახმად, უარყოფითი ზეგავლენის მინიმიზებისთვის ყავის მიღება დაძინებამდე, მინიმუმ, 8 საათით ადრე არის რეკომენდებული.

მოამზადა ლადო სულაბერიძემ