„უცხოური ვალუტის მასშტაბურ შესყიდვას ადგილი აღარ აქვს - რეზერვების შევსება უფრო სავარაუდოა, ვიდრე ლარის მნიშვნელოვანი გამყარება“

„უახლეს მაკროეკონომიკურ მაჩვენებლებზე დაყრდნობით, შეიძლება ითქვას, რომ უცხოური ვალუტის მასშტაბურ შესყიდვას ადგილი აღარ აქვს,“ - ამის შესახებ აღნიშნულია „თიბისი კაპიტალის“ კვლევაში.

აღნიშნული ფაქტორი წინა პერიოდებში ლარის გაუფასურების ერთ-ერთი წინაპირობა იყო. კვლევის თანახმად, ამ კუთხით ამჟამად ლარის გაუფასურებაზე დამატებითი ზეწოლა აღარ იკვეთება, თუმცა ჯერ-ჯერობით არც ვალუტის მკვეთრი მიწოდება შეინიშნება.

„ამ მხრივ გაუფასურების დამატებითი ზეწოლა აღარ იკვეთება, თუმცა ჯერ-ჯერობით, როგორც ჩანს, არც ვალუტის მკვეთრ მიწოდებაზეა საუბარი. არადა, იურიდიული და ფიზიკური პირების მიერ დაგროვილი სავალუტო ბუფერი მართალია არც სებ-ის საერთაშორისო რეზერვების ტოლფასია, მაგრამ არც მხოლოდ რამდენიმე ასეულ მლნ დოლარს შეადგენს და ლარის გაცვლითი კურსის არსებითად განმსაზღვრელი ფაქტორია,“ - აღნიშნულია მიმოხილვაში.

„თიბისი კაპიტალის“ პროგნოზით წლის ბოლოსთვის აშშ დოლარის ოფიციალური ღირებულება 2.73 ლარს მიაღწევს.

„ჯერ კიდევ ზაფხულის პერიოდიდან მოყოლებული საბაზო სცენარი, რომელიც წლის ბოლოსათვის აშშ დოლართან ლარის დაახლოებით 2.8 კურსს ითვალისწინებს, მცირედით მაგრამ მაინც შეიცვალა და ამჯერად საორიენტაციო ნიშნული უფრო სადღეისო, დაახლოებით 2.73-ით განისაზღვრება.

ამასთან, ლოგიკური კითხვაა, თუ დაგროვილი სავალუტო ბუფერები მასშტაბურია და ასევე, „თიბისის“ ოპერატიულ ინფორმაციასა და ოქტომბრის სავაჭრო ბალანსზე დაყრდნობით, წმინდა სავალუტო შემოდინებები კვლავ ძლიერია, რატომ არ არის განახლებულ საბაზო სცენარში ლარის დამატებით მნიშვნელოვანი გამყარება?

ვფიქრობთ, რომ ამ კითხვაზე რამდენიმე პასუხი არსებობს. პირველი, დაგროვილი ვალუტის ბაზარზე მიწოდება ჯერ კიდევ არ ფიქსირდება. მეორე, მიწოდების შემთხვევაშიც, სებ-ის სავალუტო რეზერვების შევსება უფრო მეტად სავარაუდოა, ვიდრე ლარის მნიშვნელოვანი გამყარება. თავის მხრივ, ეს დაშვება შემდეგ არგუმენტებს ეფუძნება:

1. ოქტომბრის წლიური ინფლაცია მხოლოდ 0.3%-ს შეადგენს და ლარის მნიშვნელოვანი გამყარების შემთხვევაში, დეფლაცია სულ მცირე არაა გამორიცხული, რაც, მაღალი ინფლაციის მსგავსად, პოზიტიურ განვითარებად არ აღიქმება.

2. ჩვენი შეფასებით, სხვადასხვა მიდგომის გამოყენებით, სადღეისოდ ლარი მის, როგორც მოკლევადიან, ასევე გრძელვადიან ტენდენციასთან ახლოა და, შესაბამისად, დამატებით გამყარების არგუმენტები ამ მხრივაც არ არის.

3. თავისთავად, როდესაც მხოლოდ აშშ დოლართან გაცვლით კურსზე ვსაუბრობთ, არსებითია დოლარის სხვა ვალუტებთან გაცვლითი კურსის დინამიკაც. ამ მხრივ, საშუალოვადიან პერსპექტივაში დოლარის შედარებით დასუსტება კვლავ საბაზო სცენარია, თუმცა, ერთი მხრივ, ბოლო პერიოდში საწინააღმდეგო არგუმენტები უფრო გამოიკვეთა და, მეორე მხრივ, უფრო ახლო პერსპექტივაში დოლარის დასუსტება ნაკლებსავარაუდოა“, - ვკითხულობთ კვლევაში.