„პოლიტიკური კრიზისი კვლავაც აქტუალურია - ფერხდება უძრავი ქონების სექტორის საქმიანობა“ - მებაღიშვილი
„პოლიტიკური კრიზისი კვლავაც აქტუალურია ქვეყანაში, ამ ფონზე რთულია, უძრავი ქონების ბაზრის მკაფიო ანალიზი გააკეთო“, - ამის შესახებ „ბიზნესპრესნიუსთან“ „ნოუბლ რიალ ისთეითის“ თანადამფუძნებელმა ვაჟა მებაღიშვილმა განაცხადა.
მისი თქმით, ბაზრის ანალიზის საფუძველზე ინვესტორები შესაბამის გადაწყვეტილებებს იღებენ. იმ პირობებში კი, როცა ანალიზი რთულია, ეს აისახება მათ შემდგომ ნაბიჯებზე.
„იქიდან გამომდინარე, რომ პოლიტიკური სიტუაცია და კრიზისი კვლავაც აქტუალურია ჩვენს ქვეყანაში, საკმაოდ რთულია მკაფიოდ გააკეთო ბაზრის ანალიზი. ეს კი მაშინ, როცა ეს ანალიზი ხდება ხოლმე საფუძველი ინვესტიციების მიმართულებით. არსებული სიტუაცია მეტ-ნაკლებად აფერხებს ზოგადად ჩვენს საქმიანობას.
რაც შეეხება მოთხოვნის ნაწილს, მოთხოვნა არსებობს, მაგრამ გვქონდა ეტაპი, როცა არჩევნებამდე დამკვეთები აპაუზებდნენ, ელოდებოდნენ სიტუაციის დალაგებას და ამის მიხედვით ხდებოდა მათ მიერ შერჩეული ქონების შეძენა - ეს პროცესი გახანგრძლივდა. მოთხოვნა არსებობს, მაგრამ ისეთი არ არის როგორიც იყო მანამდე, როცა სიტუაცია შედარებით მშვიდი იყო“, - ამბობს მებაღიშვილი.
როგორც მანვე აღნიშნა, უძრავი ქონების ბაზარზე გააქტიურდნენ ისრაელის მოქალაქეების, რუსეთის მოქალაქეების ბაზარზე შესვლის მაჩვენებელმა კი იკლო.
„გვახსოვს არჩევნების პერიოდშიც და მანამდეც იყო მოთხოვნა ისრაელის მოქალაქეების მხრიდან აქტიურად. ეს ტენდენცია ახლაც გრძელდება. რუსეთის მოქალაქეების შემოსვლა უძრავი ქონების ბაზარზე იმდენი აღარ არის. ამასთანავე, ადგილობრივი დამკვეთები საკმაოდ ბევრია. აინტერესებთ, როგორც პასიური ინვესტორების ნაწილი, რომელიც შემდეგ კარგი უკუგებითაა წარმოდგენილი, ასევე საცხოვრებლების შეცვლა ან გაფართოება“, - დასძინა რესპონდენტმა.
ბოლო თვეების განმავლობაში „თიბისი კაპიტალისა“ და „გალტ ენდ თაგარტის“ კვლევები აჩვენებდა, რომ ქირის ფასი კლების ტენდენციით ხასიათდება. მებაღიშვილის თქმით, ფასების კლება საგანგაშო ნიშნულამდე არ განხორციელებულა.
„ჩვენ კვლევებს რომ ვუყურებთ, ფიქსირდება რომ უკუგების მიმართულებით ერთ-ერთი მოწინავე ქვეყანა მეზობელ ქვეყნებსა და მათ შორის ევროპის ნაწილში, არის საქართველო და ეს უკუგება განსაზღვრავს ქირის ნაწილსაც. როგორ არის შესაბამისობაში გასაქირავებელი ფართი ფასთან, ამაზეა ორიენტირებული უძრავი ქონების გამქირავებელი. ამ კუთხით ფასების საგანგაშო კლება არ გვაქვს, უფრო მეტად ხდება ამ ფასების დასტაბილურება და გონივრულ ფარგლებში მოქცევა.
იჯარის ნაწილში როგორც საოფისე, ისე საცხოვრებელი მიმართულებით უფრო ხშირად ფასთან მიმართებაში გადასაჭრელი საკითხი იჩენს თავს. ფასი ბევრად მაღალია ხოლმე, ვიდრე ბიუჯეტი აქვთ გამოყოფილი და ამაზე ხდება შეთანხმება. ვცდილობთ ისეთი ფასი გამოვიყვანოთ, რაც ორივე მხარისთვის იქნება მისაღები“, - აღნიშნავს მებაღიშვილი.
