„ანაკლიის საზღვაო ნავსადგურის“ შესყიდვებისთვის სპეციალური წესი დამტკიცდა
მთავრობამ შპს „ანაკლიის საზღვაო ნავსადგურის“ მიერ საქონლისა და მომსახურების შესყიდვებთან დაკავშირებით სპეციალური წესები დაამტკიცა.
კერძოდ, დოკუმენტის მიხედვით, შესყიდვის განხორციელებისას დასაშვებია გამოიყენებოდეს იმ დონორი ორგანიზაციებისა და ქვეყნების მიერ განსაზღვრული შესყიდვის პროცედურები, რომლების შესყიდვის მონაწილეები არიან.
ხოლო იმ შემთხვევაში, თუ დონორი ორგანიზაციები და ქვეყნები არ არიან შესყიდვის მონაწილეები, შესყიდვის პროცედურები მხოლოდ საქართველოს მთავრობის განკარგულების საფუძველზე უნდა განხორციელდეს.
შესყიდვის დადგენილი წესი მოქმედებს შემდეგი სახის მომსახურებასა და საქონელზე:
- რადიოტელეფონიის, რადიოსატელეგრაფო, რადიო და ტელემაუწყებლობის აპარატურა;
- საგანგებო სიტუაციების დროს გამოსაყენებელი მოწყობილობები და უსაფრთხოების საშუალებები;
- სანავიგაციო და მეტეოროლოგიური ხელსაწყოები;
- დანადგარები მექანიკური ენერგიის წარმოებისა და გამოყენებისთვის;
- საკონსულტაციო-საინჟინრო და სამშენებლო მომსახურებები;
- ტექნიკური შემოწმება, ანალიზი და საკონსულტაციო მომსახურებები;
- კვლევისა და განვითარების დაპროექტება და განხორციელება;
- ბიზნესსა და მენეჯმენტთან დაკავშირებული კონსულტაციები და მომსახურებები;
- კონსტრუქციულ-ელექტრო-ინჟინრულ-დიზაინერული მომსახურება;
- სატრანსპორტო საშუალებებისა და მათთან დაკავშირებული მოწყობილობების შეკეთება და ა.შ.
დადგენილება 2025 წლის 1-ლი იანვრიდან ამოქმედდება და 2025 წლის 31 დეკემბრის ჩათვლით იქნება ძალაში.
შეგახსენებთ, 2023 წელს სახელმწიფომ შპს „ანაკლიის საზღვაო ნავსადგური“ დააფუძნა. საწყის ეტაპზე კომპანია უზრუნველყოფს საზღვაო ინფრასტრუქტურის (ფსკერდაღრმავების სამუშაოები; ტალღმტეხელის პროექტირება/მშენებლობა) პროექტირება/მშენებლობას.
კომპანიის წილების 100% სრულად შპს აქტივების მართვისა და განვითარების კომპანიის“ მფლობელობაში. სამეწარმეო რეესტრის ბოლო მონაცემებით კი კომპანიის დირექტორად ზურაბ სიჭინავა ფიქსირდება.
