საჯარო რეესტრის თანამშრომელთა რიცხვი, ვინც ევროინტეგრაციის საკითხზე მთავრობის გადაწყვეტილებას ემიჯნება, 385-მდე გაიზარდა
სსიპ საჯარო რეესტრის ეროვნული სააგენტოს თანამშრომლების განცხადებას, რომლითაც სააგენტოში დასაქმებულები ევროინტეგრაციის საკითხთან დაკავშირებით ხელისუფლების გადაწყვეტილებას ემიჯნებიან, გავრცელების შემდეგ 100-ზე მეტი ხელმომწერი დაემატა.
ამ დროისთვის, განცხადებას 385 თანამშრომელი აწერს ხელს.
სააგენტოს თანამშრომლები განმარტავენ, რომ ხელისუფლების გადაწყვეტილება წინააღმდეგობაში მოდის საქართველოს კონსტიტუციის 78-ე მუხლის მოთხოვნებთან.
„ხაზგასმით აღვნიშნავთ, რომ საქართველოს ადგილი არის ჰუმანურ, დემოკრატიულ ღირებულებებსა და კანონის უზენაესობის პრინციპებზე დაფუძნებულ სახელმწიფოთა გვერდით. სწორედ იმ ღირებულებებსა და პრინციპებზე, რომლებიც თავად ქართველი ერის მრავალსაუკუნოვან სახელმწიფოებრიობის ტრადიციებსა და საქართველოს 1921 წლის კონსტიტუციის ისტორიულ-სამართლებრივ მემკვიდრეობას ეყრდნობა და ამდენად, არ არის მისთვის უცხო. მაშასადამე, მისი ღირსეული ადგილი სწორედ ევროპის სახელმწიფოთა ეკონომიკურ-პოლიტიკურ გაერთიანებაშია“, - ნათქვამია განცხადების ტექსტში.
