სებ-ში საბანკო და არასაბანკო საფინანსო სექტორის წარმომადგენლებთან საგადახდო მიმართულებით მიმდინარე პროექტების ფარგლებში შეხვედრა გაიმართა
საქართველოს ეროვნულ ბანკში საბანკო და არასაბანკო საფინანსო სექტორებთან, საგადახდო მიმართულებით მიმდინარე მნიშვნელოვანი პროექტების, დროის რეალურ რეჟიმში ანგარიშსწორების სისტემის (RTGS) განახლებისა და მყისიერი გადახდების სისტემის (IPS) დანერგვის ფარგლებში მოსალოდნელ ცვლილებებთან დაკავშირებით შეხვედრა გაიმართა.
ამის შესახებ ინფორმაციას საქართველოს ეროვნულ ბანკი ავრცელებს.
მათი ცნობით, შეხვედრა სიტყვით სებ-ის ვიცეპრეზიდენტმა ეკატერინე გალდავამ გახსნა, რომელმაც მონაწილეებს საგადახდო მიმართულების პროექტების ფარგლებში მოსალოდნელ ცვლილებებზე ინფორმაცია მიაწოდა და აღნიშნა, რომ ეროვნულ ბანკი საგადახდო სისტემებზე წვდომას არასაბანკო საგადახდო მომსახურების პროვაიდერებსაც მისცემს.
„არასაბანკო საგადახდო მომსახურების პროვაიდერებისთვის საგადახდო სისტემებზე წვდომა, გაზრდის კონკურენტუნარიანობას და ხელს შეუწყობს ინოვაციური საგადახდო პროდუქტების დანერგვას. ჩვენს მიერ ორგანიზებული პრეზენტაციებისა და ტრენინგების სერია კი მიზნად ისახავს ახალი სუბიექტების მომზადებას საგადახდო სისტემაში ჩასართავად. პრეზენტაციები დაეთმობა როგორც საკანონმდებლო ასპექტებს, ასევე პრაქტიკული გამოცდილების გაზიარებას“, - აღნიშნა ეკატერინე გალდავამ.
მათივე ინფორმაციით, ღონისძიების ფარგლებში საგადახდო სისტემების დეპარტამენტის წარმომადგენლებმა საგადახდო მომსახურების პროვაიდერებს, საბანკო სექტორის გამოცდილება იმ ვალდებულებებთან დაკავშირებით გაუზიარეს, რაც საგადახდო ანგარიშების გახსნასა და სრულფასოვან მომსახურებას უკავშირდება, კერძოდ ისაუბრეს საერთაშორისო საბანკო ანგარიშის (IBAN) ფორმატის შესახებ, ასევე პროვაიდერებისთვის ახალ ვალდებულებებზე, რაც საინკასო დავალებების მართვას შეეხება.
უწყების ცნობით, შეხვედრა ინტერაქტიურ რეჟიმში წარიმართა. მონაწილეებს შესაძლებლობა ჰქონდათ მოსაზრებები გამოეთქვათ ახალ ტექნოლოგიურ გამოწვევებთან და მოსალოდნელ საკანონმდებლო ცვლილებებთან დაკავშირებით.