საქართველო-ამერიკას შორის სავაჭრო ბრუნვა შემცირდა - რას ვყიდით და ვყიდულობთ
2024 წლის იანვარ-ოქტომბერში, გასული წლის იმავე პერიოდთან შედარებით, აშშ-თან სავაჭრო ბრუნვა 5%-ით შემცირდა. საქსტატის მონაცემების მიხედვით, წელს ათ თვეში სავაჭრო ბრუნვამ 1.73 მილიარდ დოლარს მიაღწია, 2023 წლის იმავე პერიოდში კი 1.82 მილიარდ დოლარს აღწევდა.
საანგარიშო პერიოდში იმპორტი ადგილობრივ ექსპორტს მნიშვნელოვნად ჭარბობდა, თუმცა წლიურად იმპორტი შემცირდა, ქართული პროდუქციის ექსპორტი კი გაიზარდა.
უფრო კონკრეტულად, საანგარიშო პერიოდში 8.5%-ით არის შემცირებული იმპორტი. შარშან ამერიკიდან საქართველოში 1.74 მილიარდი დოლარის ღირებულების პროდუქცია შემოვიდა, წელს კი 1.59 მილიარდი დოლარის. იმპორტი უდიდესი წილი მსუბუქ ავტომობილებზე მოდიოდა.
ამერიკიდან წელს იმპორტით შემოვიდა შემდეგი 5 ძირითადი პროდუქტი:
- მსუბუქი ავტომობილები - 1.455 მილიარდი აშშ დოლარის;
- თხილი და სხვა კაკალი - 19.8 მილიონი აშშ დოლარის;
- გაყინული ხორცი და კვების სუბპროდუქტები შინაური ფრინველის - 7.88 მილიონი აშშ დოლარის;
- კვების პროდუქტები - 5.45 მილიონი აშშ დოლარის;
- მოტოციკლები და ველოსიპედები - 5.04 აშშ მილიონი დოლარის.
რაც შეეხება ადგილობრივ ექსპორტს, საანგარიშო პერიოდში წლიურად 77%-ით გაიზარდა. მონაცემების თანახმად, 2023 წელს ადგილობრივი ექსპორტიდან მიღებულმა შემოსავლებმა 69.59 მილიონ დოლარს გადააჭარბა, წელს ათ თვეში კი 123.5 მილიონ დოლარზე მეტი იყო.
აღსანიშნავია ისიც, რომ წელს ამერიკაში ყველაზე დიდი რაოდენობით ქართული წარმოების ფეროშენადნობების ექსპორტი განხორციელდა.
5 ძირითადი ქართული საექსპორტო პროდუქცია ამერიკაში ასე გამოყურება:
- ფეროშენადნობები - 90,12 მილიონი აშშ დოლარის;
- ყურძნის ნატურალური ღვინოები - 6.37 მილიონი აშშ დოლარის;
- მილები - 5.92 მილიონი დოლარის;
- ხილისა და ბოსტნეულის წვენები - 3.93 მილიონი აშშ დოლარის;
- საფრენი აპარატების ნაწილები - 3.78 მილიონი აშშ დოლარის.
