ილონ მასკი გახდა პირველი ადამიანი, ვისმა ქონებამაც 400 მლრდ დოლარს გადააჭარბა
Tesla-სა და SpaceX-ის აღმასრულებელი დირექტორი ილონ მასკი გახდა პირველი ადამიანი, რომლის ქონებამ 400 მლრდ აშშ დოლარს გადააჭარბა. ამის შესახებ CNN იტყობინება.
აღნიშნულის ძირითადი განმაპირობებელი გახდა საჰაერო-კოსმოსური კომპანია SpaceX-ის მნიშვნელოვანი წილის გაყიდვა, რამაც მასკის ქონება დაახლოებით 50 მლრდ აშშ დოლარით გაზარდა.
ხაზგასასმელია, რომ ილონ მასკის სიმდიდრის ზრდის ტემპი განსაკუთრებით გასულ თვეში დაჩქარდა, მას მერე, რაც აშშ-ის საპრეზიდენტო არჩევნებში დონალდ ტრამპმა გაიმარჯვა. სწორედ მასკი იყო მისი მთავარი პოლიტიკური მხარდამჭერი და დონორი.
აქვე აღსანიშნავია, რომ ჩატარებული არჩევნების შემდეგ Tesla-ს აქციები დაახლოებით 65%-ით გაიზარდა, რაც გამოწვეულია ინვესტორთა ოპტიმიზმით, რომ ტრამპის ადმინისტრაცია ხელს შეუწყობს ე.წ. თვითმართვადი (self-driving) ავტომობილების განვითარებას და ასევე შესაძლოა, მოხსნას საგადასახადო შეღავათები ელექტრო ავტომობილებზე, რაც Teslas-ს კონკურენტებისთვისაც მომგებიანია.
გარდა ამისა, 50 მლრდ აშშ დოლარამდე გაიზარდა მასკის ხელოვნური ინტელექტის კომპანიის, xAI-ის ღირებულებაც. არსებული ცნობებით, სტარტაპის მიმართ ინტერესი ტრამპის საარჩევნო წარმატებამ გამოიწვია.
მოსალოდნელია, რომ მასკი მნიშვნელოვან როლს შეასრულებს ტრამპის ახალ ადმინისტრაციაში და ექნება პირდაპირი წვდომა ახლადარჩეულ პრეზიდენტთან.
ბოლო ცნობებით, მსოფლიოს უმდიდრესი 10 ადამიანის სია შემდეგნაირად გამოიყურება: (bloomberg-ის რეიტინგი)
- 1. ილონ მასკი (Tesla, SpaceX) - 447 მლრდ აშშ დოლარი;
- 2. ჯეფ ბეზოსი (Amazon) - 249 მლრდ აშშ დოლარი;
- 3. მარკ ცუკერბერგი (Meta) - 224 მლრდ აშშ დოლარი;
- 4. ლარი ელისონი (Oracle) - 198 მლრდ აშშ დოლარი;
- 5. ბერნარდ არნო (LVMH) - 181 მლრდ აშშ დოლარი;
- 6. ლარი ფეიჯი (Alphabet) - 174 მლრდ აშშ დოლარი;
- 7. ბილ გეითსი (Microsoft) - 165 მლრდ აშშ დოლარი;
- 8. სერგეი ბრინი (Alphabet) - 163 მლრდ აშშ დოლარი;
- 9. სტივ ბალმერი (Ballmer Group) - 155 მლრდ აშშ დოლარი;
- 10. უორენ ბაფეტი (Berkshire Hathaway) - 144 მლრდ აშშ დოლარი.
ავტორი: რატი ერისთავი