გოგა მელიქიძემ საპენსიო სააგენტო დატოვა - ვინ შეასრულებს საინვესტიციო ოფიცრის მოვალეობას
საპენსიო სააგენტოს დირექტორმა, გოგა მელიქიძემ თანამდებობა დატოვა. ამის შესახებ განცხადებას თავად სააგენტო აქვეყნებს. მათივე ცნობით, ის კარიერას კერძო სექტორში, ცენტრალურ აზიაში გააგრძელებს.
საბჭოს გადაწყვეტილებით, მთავარი საინვესტიციო ოფიცრის მოვალეობას ლევან ვერძეული შეასრულებს, რომელიც საპენსიო სააგენტოში 2020 წლიდან საინვესტიციო სამსახურის უფროსის მოადგილის პოზიციას იკავებს.
„საინვესტიციო საბჭო მადლობას უხდის გოგა მელიქიძეს ხუთწლიანი წარმატებული საქმიანობისთვის, მისი უაღრესად მნიშვნელოვანი როლისთვის, როგორც საინვესტიციო შედეგების, ისე მაღალი კომპეტენციის გუნდის ჩამოყალიბებასა და მართვაში“ - განაცხადა საინვესტიციო საბჭოს თავმჯდომარემ, ოლივიერ რუსსომ.
გოგა მელიქიძე საპენსიო სააგენტოს 2020 წლის აპრილიდან შემოუერთდა და მისი ხელმძღვანელობით საინვესტიციო გუნდმა გადამწყვეტი როლი ითამაშა საპენსიო რეფორმის წარმატებით განხორციელებასა და საპენსიო აქტივების გონივრულ მართვასა და ინვესტირებაში.
საპენსიო სააგენტოს ინფორმაციით, სააგენტოში მუშაობის პერიოდში საპენსიო აქტივების მოცულობამ 6.0 მლრდ ლარს გადააჭარბა, ხოლო საინვესტიციო მოგება 1.4 მლრდ ლარს აღემატება.
