ქართული ღვინის ექსპორტიდან მიღებულმა შემოსავლებმა 274 მლნ დოლარს გადააჭარბა - სასმელის 70%-ზე მეტი რუსეთში გადის
ქართული ღვინის ექსპორტი 5.8%-ით გაიზარდა. 2023 წელს უცხოეთში გავიდა 89 388 ტონა ქართული ღვინო, რომლის ჯამური ღირებულებაც 257.7 მილიონ აშშ დოლარს შეადგენდა. 2024 წლისთვის ღვინის ექსპორტიდან მიღებულმა შემოსავლებმა 274.7 მილიონ აშშ დოლარს მიაღწია. ჯამში გასულ წელს ექსპორტზე 94 564 ტონა ღვინო გავიდა.
აღსანიშნავია ისიც, რომ ქართული ღვინის საშუალო საექსპორტო ღირებულება გასულ წელს მნიშვნელოვნად არ გაზრდილა. 2024 წელს 1 ლიტრის საშუალო საექსპორტო ფასი გადასახადების გარეშე 2.9 დოლარი იყო, წინა წელს კი 2.88 დოლარი. ეს ნიშნავს იმას, რომ ფასი დაახლოებით 0.7%-ით გაიზარდა.
ქართული ღვინის ძირითადი საექსპორტო ბაზარი კვლავაც რუსეთია. 2024 წელს ღვინის ექსპორტში რუსეთის წილი 70%-ს აჭარბებდა. უფრო კონკრეტულად, გასულ წელს რუსეთში 66 724 ტონა ქართული ღვინო გავიდა ექსპორტზე.
10 უმსხვილესი საექსპორტო ბაზარი ქართული ღვინისთვის 2024 წელს ასეთი იყო: (ერთი ლიტრის საშუალო ღირებულება)
- რუსეთი - 182.6 მლნ აშშ დოლარი 66 724 ტონა (2.7 დოლარი);
- პოლონეთი - 16.6 მლნ აშშ დოლარი 6 694 ტონა (2.5 დოლარი);
- უკრაინა - 12.45 მლნ აშშ დოლარი 4 500 ტონა (2.7 დოლარი);
- ყაზახეთი - 10.3 მლნ აშშ დოლარი 3 245 ტონა (3.1 დოლარი);
- ჩინეთი - 9.24 მლნ აშშ დოლარი 2 639 ტონა (3.5 დოლარი);
- აშშ - 7.14 მლნ აშშ დოლარი 1 200 ტონა (6 დოლარი);
- ბელარუსი - 6.99 მლნ აშშ დოლარი 2 457 ტონა (2.8 დოლარი);
- გერმანია - 5.87 მლნ აშშ დოლარი 1 285 ტონა (4.6 დოლარი);
- ლატვია - 4.03 მლნ აშშ დოლარი 1 095 ტონა (3.7 დოლარი);
- ლიეტუვა - 2.41 მლნ აშშ დოლარი 707 ტონა (3.4 დოლარი).
რაც შეეხება იმპორტს, საანგარიშო პერიოდში 27%-ით არის გაზრდილი. კერძოდ, 2024 წელს ქვეყანაში იმპორტირებულია 7.4 მილიონი აშშ დოლარის 798 ტონა ღვინო, ხოლო 2023 წელს 5.9 მილიონი აშშ დოლარის 629 ტონა. ამის პარალელურად მცირედით შემცირებულია იმპორტირებული ღვინის საშუალო ფასი. მაგალითად, 2023 წელს 1 ლიტრის იმპორტი გადასახადების გარეშე საშუალოდ 2.9 დოლარი ჯდებოდა, 2024 წელს კი ღირებულებამ 2.88 დოლარამდე კლება აჩვენა.
ქვეყანაში ღვინის უდიდესი ნაწილის იმპორტი საფრანგეთიდან ხორციელდება. მაგალითისთვის, 2024 წელს ფრანგული ღვინის წილი ღვინის იმპორტში 16%-ს აჭარბებდა. 5 ძირითადი ბაზარი ღვინის იმპორტისთვის ასე გამოყურება:
- საფრანგეთი - 3.25 მლნ აშშ დოლარის 132 ტონა;
- იტალია - 2.46 მლნ აშშ დოლარის 378 ტონა;
- ესპანეთი - 368 ათასი აშშ დოლარის 53 ტონა;
- რუსეთი - 207 ათასი აშშ დოლარის 76 ტონა;
- გერმანია - 179 ათასი აშშ დოლარის 15 ტონა.
