„კომერციული ფართების ფასი შესაძლოა, გაორმაგდეს“ - მარტიდან ბათუმში უძრავი ქონების გაძვირებას ელოდებიან

ბათუმში გაზაფხულიდან უძრავი ქონების გაძვირებას ელოდებიან. „ბიზნესპრესნიუსთან“ „რეინვესტის“ დამფუძნებელი ლევან ბოლქვაძე გაძვირების რამდენიმე წინაპირობაზე საუბრობს.

მისი თქმით, მოლოდინები პირველ რიგში, გამოწვეულია EMAAR ჯგუფის მიერ დაანონსებული ბათუმსა და გონიოში განსახორციელებელი 6 მლრდ დოლარამდე ღირებულების ინვესტიციით. კერძოდ, ბაზარზე აქვთ მოლოდინები, რომ საინვესტიციო წინადადება ზღვისპირა ტერიტორიებით სხვა ინვესტორების დაინტერესებასა და ფასების ზრდას გამოიწვევს.

შეგახსენებთ, EMAAR ჯგუფის მიერ (შვილობილი Emaar Properties/Eagle Hills) საქართველოში განხორციელდება დაახლოებით, 6 მლრდ დოლარის ინვესტიცია, რის შედეგადაც განვითარდება მულტიფუნქციური დეველოპერული პროექტები თბილისში, ბათუმსა და გონიოში. პროექტი „გონიოს მარანი“ 260 ჰექტარზე განხორციელდება. დაგეგმილი ინფრასტრუქტურა მოიცავს სასტუმროებს, სავაჭრო ცენტრებსა და ბრენდულ საცხოვრებლებს. რენდერებიდან ჩანს, რომ პროექტის ფარგლებში სანაპიროზე იახტ-კლუბის მოწყობაც იგეგმება.

გაზაფხულიდან უძრავი ქონების გაძვირებას ელოდებიან ბათუმში

„ბოლო დროს გავრცელებულ ინფორმაციას მსხვილ ინვესტიციასთან დაკავშირებით, დიდი გავლენის მოხდენა შეუძლია უძრავი ქონების ბაზარზე. ეს ინვესტიცია თუ რეალობასთან ახლოს მივიდა, გამოიწვევს მოთხოვნის და შესაბამისად, ფასის ზრდას. ჩვენ თუ დავინახეთ მარტის პერიოდში, რომ ამ ინვესტიციას სხვა დაინტერესებული ინვესტორები შემოჰყვა არაბული ქვეყნებიდან ან ევროპის ქვეყნებიდან, შეიძლება ამან გამოიწვიოს ფასების ზრდა“, - დასძინა ბოლქვაძემ.

უძრავი ქონების გაძვირების მოლოდინები დაკავშირებულია პროექტების თვითღირებულების ზრდასთანაც. ამ ნაწილში საუბრისას რესპონდენტი ყურადღებას ამახვილებს სამშენებლო მასალების გაძვირებასა და საპროცენტო განაკვეთების ზრდაზე.

ცნობისთვის, 2024 წლის დეკემბერში მშენებლობის ღირებულების ინდექსი წლიურად 4.7%-ით გაიზარდა. ზრდა, უმეტესწილად, გამოწვეული იყო მშენებლობის დარგში დაქირავებით დასაქმებულთა საშუალო თვიური ნომინალური ხელფასის 19.7%-იანი ზრდით და სამშენებლო მასალების 3%-იანი გაძვირებით.

„ბოლო პერიოდში გაძვირებულია სამშენებლო მატერიალური მასალები. შექმნილმა კრიზისულმა პერიოდებმა საპროცენტო განაკვეთების მცირეოდენი ზრდა გამოიწვია და საბოლოოდ, ფინანსური რესურსი გაუძვირა დეველოპერს. ეს ყოველივე იწვევს უძრავი ქონების თვითღირებულების გაძვირებას. გაზრდილი მოთხოვნა და თვითღირებულების გაზრდა კი ცალსახად გამოიწვევს ფასების მატებას“, - განაცხადა ბოლქვაძემ.

ამასთანავე, მანვე აღნიშნა, რომ საცხოვრებელი ბიზნესის გაძვირებასთან ერთად მოსალოდნელია კომერციული უძრავი ქონების ფასებიც ზრდაც. ბოლქვაძის თქმით, ამ შემთხვევაში ფასები შესაძლოა, გაორმაგდეს.

„კომერციული უძრავი ქონება ბათუმში არის ლიმიტირებული რაოდენობის და ამ მიმართულებით შესაძლოა, ბევრად მეტი, ორჯერ გაძვირება მაინც მოხდეს, ვიდრე ბინების შემთხვევაში, რადგან ბინების მიწოდება საკმაოდ მაღალია ბათუმში. მაგალითად, 40-სართულიან კომპლექსში გვხვდება მხოლოდ ერთ-ორ სართულზე კომერციული ფართი. ბათუმში არ გვაქვს B კლასის ბიზნეს ცენტრები. თუ მარტში ან აპრილში ბინის ფასი გაიზრდება, გქონდეთ მხედველობაში, რომ კომერციული საოფისე ფართის ფასი შესაძლოა, გაორმაგდეს“, - აღნიშნავს ბოლქვაძე.